EDITORYAL – Ayaw sab sila hikalimti

Sa atong editoryal kagahapon atong gipahinumdoman ang mga Sugbuanon nga ang nagpasiugda sa Sinulog sa Sugbo mao si kanhi Customs Collector David "Boy Odilao Jr.

Ato sang gihisgutan si abogado Manuel "Maning" Oyson Jr. nga maoy niabag kang Ginong Odilao sa relihiyosong proyekto niini.

Maayo usab tingali kun ato sang hisgutan ang dakong tabang nga nahimo sa mga kawani sa Ministry of Youth and Sports Development (MYSD-7) diin adtong tungora si Ginong Odilao maoy regional director.

Ang maong mga kawani nitabang sa tanang aspeto sa proyekto apil na niini ang mga pagpangontak sa mga administrator sa mga eskuwelahan kinsa gihangyo sa pag-apil sa giplanohang Sinulog procession.

Sila usab ang nagbantay sa budget sa maong proyekto ug unya misab-wag usab sila sa balita nga anaay matahom nga talan-awon nga umaabot atol sa Pista Senyor pinaagi sa mga sakop sa local media.

Oo, kinahanglan paambiton usab og recognition ang mga kawani sa karon defunct na nga MYSD kinsa mihatag sa hugot ug higpit nga kooperasyon ngadto ni Boy Odilao hangtod nakab-ot ang kalampusan.