Dios alang sa tanan

Ang Dios Miingon... Pamalandong matag Domingo
Enero 8, 2006; Domingo sa Epipaniya sa Ginoo-Solemnidad
Mga Pagbasa: Is. 60:1-6?Ef. 3:2-3, 5-6?Mt. 2:1-12

Daw sa dili katuohan ang mga panghitabo sa bag-ong tuig nga misugat kanako og sa akong banay. Kay niadtong Disyembre 31, 2005 nitaliwan ang akong amahan. Mopahulay na unta siya sa kalinaw ug nga hatagan unta siya sa Dios og kapasayloan tungod sa mga sala nga iyang nahimo sa dihang buhi pa siya. Ug mabatonan unta pud namong mga buhi pa ang pagkaalim sa mga samad sa kasamtangan nga bunga og gidisdisan sa kagahapon.

Epipaniya kon ang Pagpadayag sa Ginoo karong Domingoha. Gihatagan og dakong pagtagad ang mga papel sa tulo ka mga maalamon kon mga mago. (Ang uban miingon nga three kings kini sila og nailhan sa mga pangalang Melchor, Gaspar, ug Baltazar). Hinuon ang importante mao nga sila mihatag og pagyukbo sa batang Jesus ug mihalad kaniya og Bulawan, Insenso, ug Mira. Mga timaan og simbolo sa matang sa pagkatawo nga milimin sa kinatibuk-ang tumong og tuyo kon nganong nahiabot ug nipuyo uban kanato ang Dios.

Ang mensahe mao: "Ang Dios alang gayud sa tanan." Dili siya alang lang sa usa ka hut-ong sa kaliwatan og katawhan sa katilingban. Nga ang iyang kaluoy ug gugma alang gayud sa tanan.

Kadaghanan kanato ang usahay nahimong mga exclusivist. Nahimo kitang makapanghimaraot sa uban. Nahimo kitang mas estrikto pa sa Ginoo nga mipadayag sa iyang kaugalingon tungod og alang sa Kaluwasan sa kadaghanan.