EDITORYAL – Tinuod nga hinungdan

Kun ihinayon ni Mayor Tomas Osmeña ang iyang laraw, duha na ka tuig karong Enero nga wala nay Sinulog sa Kabataan.

Tungod man gud kini, sumala pa sa mayor, sa pagkubos sa performance rating sa mga tinun-an sa elementarya ug sekundarya.

Ang Sinulog sa Kabataan ba gyuy hinungdan sa bati nga performance sa mga tinun-an sa National Elementary Achievement Test (NEAT) ug National Secondary Achievement Test (NSAT)?

Ang makaluluoy nga sitwasyon sa mga tinun-an nga anha magklase sa sawog tungod sa ilang kadaghan nga dili na paigong mapalingkod sa gubaong mga lingkuranan; lima ka mga bata nga mag-share og basa sa usa ka gision nga libro; pipila sa mga tinun-an nga mang-eskuwela bisan walay kaon (malnutrisyon); magklase sa ilawom sa punuan sa kahoy kay kulang ang lawak-saringan; kakulang sa mga modernong leksiyon tungod sa kakulang sa programang gipatuman sa kagamhanan, ug daghan pa, maoy angayang tan-awon sa mayor.

Walay pagtuon nga magtumbok nga ang Sinulog sa Kabataan maoy nakaingon sa bati nga performance sa mga tinun-an.

Busa, laing mga "factors" ang angayang suwayan og lili sa mga opisyal.