Vigilante-style killing maayong susihon

Maayo tinuod nga mahimoan og pakisusi sa House Committee on Human Rights kining mga nagsunod nga 'extrajudicial killings' nga nakapadaut sa pangalan sa Sugbo.

Gihinganlan na gani ang dakbayan sa Sugbo nga "Murder City" gumikan niining 103 na ka insidente sa vigilante style killing sukad niadtong Disyembre 22,2004.

Kining inquiry nga panguluhan ni Akbayan Partylist Rep. Loreta Ann Etta Rosales maoy moklaro sa mga isyung gibato dinhi sa mga opisyal sa dakbayan nga may kalambigitan sa mga pagpatay.

Makatabang pa kini sa kapolisan aron bisan pinugos masulbad gyud ang mga vigilante style killing nga nagtapun-og sa lamesa sa kapolisan. Sagad nga rason sa mga polis walay buot motestigo ug walay interes ang mga kabanay sa mga gipamatay.

Dunay punto si Rosales sa iyang nakitang iregularidad kay bisan usa walay nailhan o ba kaha gisuspetsahan ang mga polis nga magsilbeng "lead" sa kaso aron masugdan ang mas lawom pang imbestigasyon.

Sakto usab si Rosales sa panaway niyang maayo pang wagtangon ang police force dinhi sa dakbayan kung di makahimo sa ilang trabaho sanglit magsalig raman ang mga polis sa mga tawo.

Tabla ra sila'g "dawat og limpyo."