Dead men tell no tales

GANITO siguro ang gustong ipaalala ng PNP-TMG Task Force Limbas sa lahat ng mga kriminal na mga carnappers and carjackers sa lansangan. Sabi nga, stop it or 6 feet below the ground kayo, mga kamote.

Dedbol on the spot sina Anthony Brian Dulay, Anton Co Unjieng at Francis Xavier Manzano, mga anak millionaires kasi suspected carjackers daw sila kaya niratrat. Sinalto sila ng 10 members ng Task Force killer, este mali, Limbas pala.

Ikinalulungkot ng mga kuwago ng ORA MISMO ang pagkamatay ng mga bata. Sumalangit nawa ang kanilang kaluluwa!

Dehins kinakampihan ng mga kuwago ng ORA MISMO ang mga bata kung mali sila, dapat lang ang nangyari para mabawasan ang masasamang elemento sa kalye. Ang dehins lang gusto ng mga kuwago ng ORA MISMO, ay overkill ito. Ika nga, double dead!

Sa palengke, kapag double dead ay dehins na binibili at pinarurusahan ng mga authorities ang nagsasalya nito. Tama ba, DILG Secretary Angelo Reyes, Your Honor?

Hindi ba may karapatan ding mabuhay ang mga kriminal kahit na anong sama ang kanilang ginawa? Sa parte ng tatlong bata, kitang-kita sa video ang walang pakundangang pagbaril sa kanila. Disable na, niratrat pa.

Bumalik tuloy sa alaala ng mga kuwago ng ORA MISMO, ang isyu regarding Kuratong Baleleng. Ganito halos salvage, ika nga?

"Parang Kuratong Baleleng part 2 din pala ang nangyari," sabi ng kuwagong Human Rights Lawyer.

"Magkaroon kaya ng maayos na imbestigasyon ang isyung ito?" tanong ng kuwagong Kotong cop.

"Siguro dahil mga taga-TMG din ang nag-iimbestiga," naiinis na sabi ng kuwagong maninipsip ng tahong.

"Basta ang importante iparating sa mga kriminal ang senyales ng katulisan, este mali, kapulisan pala na walang dapat mangibabaw sa butas, este mali, batas pala," sabi ng kuwagong SPO-10 sa Crame.

"Tiyak bang may kasalanan ang mga batang pinatay?"

"Iyan nga kamote ang itinatanong din natin!" He-he-he!