Wala pa gyuy usa nga nasulbad

Miabot na og 101 ka mga tawo ang gitipi dinhi sa dakbayan nga gipasangil ngadto sa mga vigilante.

Apan wala pa gyud kita makabati og bisan usa lamang sa maong gidaghanon sa mga kasong extra-judicial killing nga nahatagan og kasulbaran sa kapolisan sa dakbayan.

Bisan na lamang ang pag-ila sa mamumuno, wala gyuy nahimo ang kapolisan.

Si Cebu City Police acting Director Mariano Natuel miangkon sa kapakyasan sa kapolisan pagsulbad sa mga vigilante-type killing. Apan dali niyang gipanalipdan ang iyang departamento pinaagi sa pag-ingon nga kulang o walay mga "sophisticated" nga mga kahimanan ang kapolisan aron makasulbad sa krimen bisan walay kooperasyon sa komunidad.

Sa pamahayag ni Natuel, daw wala na gyuy paglaum pang madaginot ang mga Sugboanon nga masulbad kining mga patay sa dakbayan.

Niay sugyot: Isangon ngadto sa bag-ong mga polis ang matag usa ka kaso nga vigilante-type killing.

Sa ingon, aduna gyuy idestino nga "special investigator" sa matag usa ka kaso. Kini nga imbestigador ang pangayuan sa matag update sa kaso.

Kun seryoso ang kapolisan ug kun dili tinuod ang gituohan sa kadaghanan nga polis ra o binuhi sa mga polis ang mga vigilante, pangitaan gyud og paagi sa kapolisan ang pagsulbad niini.