EDITORYAL - Kining diskuwento sa mga tiguwang pasahero

Mireklamo ang daku-dako sa usa ka pundok sa mga PUJ drivers batok sa balaod nga mihatag og 20 porsiyento nga diskuwento ngadto sa mga tiguwang -- senior citizens -- nga pasahero.

Ang maong reklamo kusganong gipadayag ni Rudy Laconza, presidente sa Alliance of Transport Operators Members Intra City (ATOMIC), human mipahibawo si LTO-7 operations chief Vicente Gador Jr. nga ilang pakusgan ang pagpatuman sa balaod nga nag-obligar sa mga drayber paghatag og diskuwento sa senior citizens.

Matud ni Laconza mosamot kagamay ang kita sa mga drayber kun ipugos ngadto kanila ang pagpatuman sa diskuwento nga gimando sa balaod.

Sukad sa pagpasar niining kontrobersyal nga balaod kanunay kita makasaksi og mainitong panaglalis tali sa mga drayber sa PUJ ug mga tiguwang pasahero nga gustong makaangkon sa gamay'ng kaayohan nga gihatag kanila sa balaod.

Daghang mga senior citizen ang na-insultohan ug na-uwawan gumikan sa pipila ka mga bastos nga drayber ug konduktor nga nagdumili sa pagrespetar sa gihisgutang balaod.

Mas maayo tingali nga mopasakag pormal nga protesta ang mga drayber batok niining maong balaod ngadto sa Kongreso diin gipanday kining maong kasugoan.

Paninguhaon sa mga drayber nga mapapha kun ma-pel kining ilang gikalagutan nga balaod. Apan samtang anaa pa kanang balaura kinahanglan nga ila kining sundon ug tumanon kay balaod gud kana.