EDITORYAL - Kampanya vs. Colon sidewalk vendors

Ginumerohan na ang mga adlaw sa mga sidewalk vendors nga nanginabuhi sa mga aseras sa dan Colon. Kana kun dili mausab ang desisyon sa City Hall nga papahawaon sila sa dili madugay.

Ang maong desisyon gibase usab sa mga reklamo sa daghang mga tag-iyag tindahan sa maong dapit. Ug reklamo usab sa mga pedestrian nga kining mga vendor mipagamay na lang sa agianan sa mga tawo diha sa mga aseras.

Nagkadaiya lang ang mga matang sa negosyo diha sa Colon sidewalk -- pagkaon, sarisaring dry goods, prutas, pirated CDs, ayohanan sa mga relo ug alahas, etc.

Hinuon giklaro sa City Hall nga kadto lang mga newcomer kun bag-o pang namaligya diha sa aseras ang papahawaon. Pabilin ang mga karaan nang sidewalk vendor.

Tuod man, pipila ra man ang mga vendor diha sa mga aseras ug sidewalk sa Colon kaniadto. Wa may nireklamo nga sila nakabalda sa pedestrian flow.

Apan karon grabe na gyud kadaghan sa mga vendor. Ang uban moukopar nag dagkong espasyo diin nagkagamay na ang agianan sa mga tawo. Kini tungod kay gipasagdan lang ang si bisan kinsa nga gusto mobaligya og bisan unsa usab nga butang sa maong dapit.

Manghinaut kita nga wa lay kagubot nga mahitabo atol sa demolisyon niining mga sidewalk vendor nga wala maka-qualify sa pagpabilin sa ilang puwesto.