EDITORYAL - Kutob ra sa rekord, way sulbad

Nanghambog si Mayor Tomas Osmeña sa pagkunhod og 30 porsiyento sa krimen nga nanghitabo dinhi sa Sugbo.

Walay nakit-ang rason ang mayor nganong mikunhod ang krimen kun dili mao ang extra-judicial killing nga naila natong vigilante killing.

Apan maayong masayod ang mayor nga nagbase lamang siya sa mga insidente nga na-rekord sa kapolisan.

Pila kaha ka insidente sa pagpanulis, pagpanglabni, pagpanguot nga wala makaabot sa kapolisan kay wala mo-report aron magpa-blotter ang mga biktima?

Pila na ka insidente nga ang biktima magdumili pagdangop sa kapolisan tungod sa pagtuong wala gihapoy sulbad nga mahatag sa nahitabo nila?

Sama pananglit sa nahitabo ni Dr. Oscar Davide, ang igsuon ni Supreme Court Chief Justice Hilario Davide Jr., nga gikuotan samtang nag-atang og masakyang PUJ kay gikan nanimba sa Cathedral.

Hain kaha karon maglaroylaroy ang mikuot sa iyang pitaka?

Mahatagan kaha og sulbad sa kapolisan ang nahitabo sa igsuon sa chief justice?

Sa ato pa, kutob ra sa pag-rekord sa insidente ang kapolisan.

Sa pagsulbad niini, lain na usab kanang estoryahon.