May sukaranan ba ang pagkuwestiyon sa kalidad sa mga gradwado sa Cebu State College of Science and Technology (CSCST) human pasanginli ang mga tagduma nga maoy utok sa maniobra paghimong "diploma mill" sa eskuylahan? Samtang di makiangayon nga lahapon pagtulisok ang tanang gradwado, nga ang kasagaran nakamatuod sa ilang katakos sa ilang gipili nga mga natad sa panginabuhi, di kalikayan ang pagsukna kanus-a nagsugod ang gipasangil nga maniobra?
Mas importanteng pangutana: CSCST ra bay gidudahan nga nag-pabrika og mga diploma nga gipanghatag ngadto sa ilang mga gradwado, nga naglakip di lang sa mga tagduma kon dili hasta na sa ilang padrinong mga negosyante ug mga politiko, nga wa katungha sa ilang mga klase, wa kakat-on sa ilang mga leksiyon ug di gyod angayng pasidunggan sa titulo sa kurso?
Ang nagkalainlaing mga ahensiya sa gobyerno, apil nang Departamento sa Edukasyon ug Commission on Higher Education, nanghunaw sa pagpanginlabot sa kontrobersiya sa CSCST ug ubang mga kolehiyo ug unibersidad sa gobyerno nga gipasanginlan nga niwatas-watas sa kaligdong sa ilang diploma ug ubang matang sa kahiwian ug pagpahimus. Kay ubos sa balaod, ang state colleges ug universities dunay gahom sa pag-umol sa ilang kaugalingong sistema ug mga lagda nga moduma sa ilang mga gimbuhaton.
Ang boards of trustees maoy kinatas-ang ahensiya nga gitahasan pag-umol sa mga lagda nga moduma sa operasyon sa kontrobersiyal nga mga eskuylahan. Apil sa mga sakop sa boards ang mga politiko nga way panahon sa pagsusi unsay aktuwal nga nahitabo sa kapid-an ka eskuylahan ug mga representante sa pribadong sektor nga andam molingiw sa bisan unsang kalapasan bugti sa mga pabor nga ilang makuha sama sa, nakatag-an mo, libre ug abundang mga diploma.
Ang nagpakabanang mga kawani sa Mandaue City campus, nga maoy gilista nilang Dr. Jose Sal Tan ug ubang tagduma sa CSCST nga ilang gi-gradwaran sa mga kursong "post doctoral/post graduate course" ug "Bachelor of Arts General" niadtong Hunyo 10, 2005, nipasabot nga wa sila motanyag sa duha ka kurso. Ang bugtong nilang papel mao ang pag-andam sa conference halls sa SM City Cebu nga maoy gihimoan sa gikuwestiyon nga gradwasyon.
Samtang tinuod nga gihimo na sa bantogang mga eskuylahan sa nagkalainlaing kanasuran ang pagtudlo sa mga kurso nga mahimong di magkita ang mga magtutudlo ug mga tinun-an, gihulagway nga mas kuwestiyonable ang giingong mga binuang sa CSCST: •Gipasanginlan ang mga tagduma nga sila ra say mga magtutudlo ug mga tinun-an sa bisan unsa na lang kurso nga ilang mahunahunaan nga itanyag; •Gawas nga libre sa matrikula, ang mga tagduma magdawat pa gyod og suholan isip mga magtutudlo; ug •Ang mga magtutudlo ug mga tinun-an magdungan pagpaso sa gradwasyon inigkahuman sa semestre.
Email:
leo_lastimosa@abs-cbn.com