Kon walay job order

Mga suki, aniay bigtime nga modus operandi nga lisod kaayong masakpan kon dili ka gayod magmabinantayon. Kabahin kini sa illegal recruitment nga gipaagi sa limpiyo ug daw legal nga paagi.

Kada adlaw daghang mga Pinoy ang maglinya sa Department of Foreign Affairs aron pagkuha og pasaporte. Namasin sila nga makatrabaho sa gawas sa nasod ug mokita og dolyares. Sa ingon, mahaw-as sila sa kalisod.

Kana lagi kon legal ang ilang giaplayan ug dili sila mabiktima sa mga illegal recruiter nga walay katagbawan sa pagpahimulos ug pagpamentaha sa ilang isigkatawo. Daghang mga illegal recruiter karong panahona nga padayong nakalusot bisan kon bistado na ang ilang estilo.

Kon demalason nga mabiktima sa illegal recruitment, maimpas ang tanang kabtangan, magapos pa sa utang ug wala na gayoy kapanginabuhian. Haskang paita. Didto lang sa kaulohan, adunay recruitment agency nga nakabiktima nag kapin sa 5,000 ka aplikante nga buot mo-abroad.

Sumala sa Presidential Anti-Illegal Recruitment Task Force nga gipangulohan ni Director Reynaldo Jaylo, dako gayod og kitaon ang mga illegal recruiters sa mao nilang raket. Matud pa, mokabat sa P100,000 ang pangayoon nilang placement fee sa mga aplikante.

Ang labing bantayanan pa gayod mao nga bisan diay ang mga lisensiyadong recruitment agency puyde diay gihapon nga makapangilad ngadto sa mga aplikante nga gustong manarbaho sa langyaw'ng lapyahan. Sama pananglit sa recruitment agency sa giilang rayna sa illegal recruitment didto sa kaulohan.

Ang estilo sa iyang modus operandi mao nga gigamit niya ang iyang recruitment agency sa pag-agni sa mga tawo nga manarbaho sa abroad. Pasaligan niya nga dali ra silang makatrabaho sa gawas sa nasod pinaagi sa iyang ahensiya.

Adunay lisensiya sa Philippine Overseas Employment Administration ang agency sa maong rayna sa illegal recruitment, mao nga kon tukion pag-ayo, limpiyo kini. Apan ang twist sa iyang operasyon mao nga wala siyay gihuptang "job orders" gikan sa mga kompaniya sa abroad. Maong wala siyay kapasudlan sa iyang mga na-recruit bisan usa na man lang kanila sulod sa lima ka tuig nang pag-operate sa iyang agency. Pastilan, pagkapait niining hitaboa...!

Matud pa ni Jaylo, dili kumo kay lisensiyado gikan sa POEA ang usa ka recruitment agency dili na kini makapangilad ngadto sa mga aplikante. Makapangilad gihapon kon walay job order. Mao nga angay i-verify kon may job order ba o wala. Pero usahay sab, bisan 10 ra ang job orders modawat silag daghang aplikante.

* * *

Sumbong ug reklamo? Text sa 0910-8105522)