Ang rason mao nga taas na kuno kaayo ang presyo sa gasolina ug uban pang produkto sa lana nga ilang gigamit alang sa ilang mga sakyanan.
Atong gipangutana ang pipila ka mga drayber sa taxi dinhi sa ato (Sugbo) unsa may ilang hunahuna niining tinguha sa Manila taxi operators nga patas-an pa gyud ang flagdown rate, ug parehas ang ilang mga tubag: "Naglisud man gani tag pangitag pasahero ron, unsa pa kahag himuon na kinig P45."
Suma pa nila, aprob sila sa umento kun dili sab patas-an sa mga operator ang ilang boundary kun abagan. Ang mga operator kuno mao ray mabulahan sa umento sa flagdown rate.
Nangutana sad kita sa pipila ka mga hinakay og taxi bahin sab sa ilang hunahuna kalabot niining pag-umento sa flagdown rate ug nagkapareha sad ang ilang mga tubag: "Taas na kaayo. Di na kaabot ang atong budget...Mapugos na lang ta ini sa pagsakay sa PUJ."
Makatarunganon man sab tingali kining tinguha sa mga taxi operator sa pagpataas sa flagdown rate tungod sa nagkataas sab nga presyo sa produkto sa lana, lakip na ang gasolina, nga dunay labot sa operasyon sa ilang mga sakyanan apan ang gipaabot kun suholan sa mga sumasakay nagpabilin sa ubos. Maayo pa untag duna say umento sa suweldo kay patas-patas ra.
Sa pagkakaron magpaabot na lang ta unsay dangatan sa petisyon sa mga operator sa taxi.