Lapok ni Glo

Human nabulilyaso ang iyang press conference sa Malakanyang sa niaging adlaw, kanus-a iyang giabog ang foreign correspondents gikan sa Palasyo ug ang gihatagan og higayon mao rang labing taphaw nga mga pangutana, hingpit na gyong nisutoy nang media blitz ni Presidente Gloria Macapagal-Arroyo pinaagi sa pagpa-interview sa pinili nga news organizations.

Pero tak-om lang gihapon siya labot sa labing importanteng kontrobersiya nga nakapatay-og sa iyang administrasyon: Ang audio recording sa giingong panag-istorya nilang kanhi Comelec Commissioner Virgilio Garcillano. Di siya mokomentaryo sa bisan usa sa 15 nila ka panag-istorya nga klarong gitumong pagmaniobra sa resulta sa eleksiyon sa niaging tuig. Di pa gyod gani siya moangkon hangtod karon kon si Garcillano ba "ang opisyal sa Comelec" nga iyang gika-istorya.

* * *

Maapiki na gani si Presidente Arroyo, pananglitan dihang gikuhaan siyag reaksiyon sa pasangil ni Arsobispo Oscar Cruz nga nakasaksi siya sa paghatag og tag-P2 milyones nga jueteng payola ngadto sa 13 ka regional directors sa Comelec sud mismo sa iyang pinuy-anan sa La Vista, Quezon City sa wa pang eleksiyon sa Mayo sa niaging tuig, modayon siyag ingon nga naghinobra nang "trial by publicity" batok niya.

Mahimo bang hunghongan ang presidente nga way laing kapaingnan ang mga namasangil batok niya gawas sa katawhan nga maabot lang pinaagi sa media kay:

Una, di siya mapasakaan og kaso sa korte kay duna siyay immunity; Ikaduha, lisod dangpan ang kapolisan ug ubang ahensiya nga gitugyanan pag-imbestigar sa dagkong krimen kay pulos man giduma sa iyang mga tinudlo; ug

Ikatulo, ang impeachment nga maoy gitakda sa konstitusyon nga paagi pagtangtang niya sa katungdanan maglisod pag-ugpo tungod sa makabungog niyang mayoriya sa duha ka bay balaoranan.

* * *

Hapit ko mahagbong sa akong lingkoranan dihang niingon ang presidente nga di siya motubag sa mga atake batok niya kay di siya gustong mobawos paghimo og personal nga mga atake sa iyang mga kaatbang. Kinsa man intawoy iyang ilaron? Ang iyang pagpakahilom sa niaging kapin sa usa ka buwan natapakan sa gatosan ka pilo sa bastos ug iresponsableng kampanya sa iyang gamhanang makinarya sa propaganda nga nibuong sa kadungganan sa tanang nipaluyo sa sibawng awhag para sa iyang resignasyon sa Malakanyang.

Ang labing klarong mga ebidensiya nga siyay utok, o labing menos siyay nagtugot, sa pagpanglabay og nangalisbong lapok sa mga bakak ngadto sa iyang mga kaatbang mao ang nabistong pagpagawas sa Malakanyang og minilyon ka pesos pagpalit sa sipsip nga mga sakop sa media ug ang pagdumili niya pagbadlong ni Justice Secretary Raul Gonzalez, nga klarong maoy gihimong berdugo sa iyang administrasyon, pag-insulto sa tanang nangahas pagbarug batok niya-gikang Susan Roces ngadtong Cory Aquino, kanhi budget secretary Emilia Boncodin ug sa party list groups.

* * *

Email: [email protected]