Tambal ug masyaw

Maayo kining lakang nga ang mga tagdumala sa publikong tambalanan mao na lang ang tugyanan sa pagpamalit og mga gikinahanglang tambal aron nga molambo ang serbisyo niini ngadto sa publiko.

Nabantayan man god nga sa kasamtangan karon nga "setup" dunay paglangay-langay sa pagpahigayon og bidding, unya ang uban pang tambal nga pamaliton dili maoy gikinahanglan sa mga doktor.

Resulta, ang ubang mga tambal dili kaayo magamit. Nganong dugay-dugayon man usahay ang pag-aprobar sa pagpamalit og mga tambal? Aw nasayod na kamo sa rason niini nga gitumong aron makakwarta.

Mao pay limitado ang kwarta nga gigahin sa pagpamalit og tambal, unya malangan pa g'yod, mosamot ang problema.

Tan-awa ra god ang pharmacy diha sa Cebu City Medical Center, ang sulod diha mga dextrose na lang ug uban nga yano kaayo nga kagamitan, sama sa injection. Tambal pwerteng gamaya nga kon mohatag ka og resita halos balibaran na ang tanan.

Ngano man? Tungod kini kay ang gahin sa pagpalit og tambal gamay ra kaayo unya malangan pa g'yod ang pagpamalit.

Nindot kining lakang ni Kongresista Roseller Barinaga sa Second District sa Zamboanga del Sur nga misugyot og balaudnon nga usbon ang lagda diha sa Local Government Code nga ang pag-aprobar sa mga palitonon tambal itugyan na lang sa mga hepe o direktor sa public hospitals.

Ang mga doktor man g'yod maoy mas nasayod. Kon magduda nga dunay binuang, ipa-audit god og maayo unya kon may makita nga kahiwian pasakaan og kaso.

* * *

Dili ra kay sa amihanang Sugbo misiaw kining masyaw. Apil na sa habagatang bahin sa Sugbo og sa uban pa ganing mga dapit dinhi sa probinsya.

Nakadawat ko og text message gikan sa usa ka lumulopyo sa Carcar. Ang iyang mensahe nagkanayon.

"Daghan ang nagpakabuhi diri isip coordinator anang masyaw pero wala man panakpa sa mga polis diri, ngano man kaha ning binuanga, duna g'yoy datung siguro."

Unsay ikasulti ninyo niining maong mensahe mga polis diha sa Carcar? Magpabuta-bungol ra ba kamo niini?

Ayaw ko'g ingna nga sundon ninyo si Koronel Drusillo Bolodo nga maghilom-hilom lang sa pagkuyanap na pag-ayo sa masyaw ug video karera sa lainlaing dapit sa probinsya.

Kon tinuod pa nga kini si Bolodo nagtinguha g'yod pagpuo sa mga illegal nga sugal sa iyang hurisdiksyon, iya na untang gihimoan og kampanya ang mga operator sa video karera ug masyaw sa Bogo, Medellin ug silingang mga lungsod.

Duna man tuo'y dakop apan maisip nga makitang-tao ra. Binuwan ang dakop. Ayaw na lang ko, drama.

Tungod kay wala man kaayo'y aktibong kampanya nga gihimo si Bolodo batok sa illegal nga sugal, dili sama kaniadto sa panahon ni Koronel Vic Loot, hapit na ko motoo nga iyang giprotehean kining maong mga illegal nga sugalan.

Ambot nganong nagpabilin pa man kini si Bolodo diha nga subra na man unta sa usa ka buwan ang iyang pagka OIC. Naa sa balaod nga ang OIC kutob ra sa usa ka buwan ang paghupot sa maong pwesto.