Papa Juan Pablo II

AYON sa mga opisyales ng Vatican, ang ating mahal na Papa Juan Pablo II ay yumao nang ganap na ika-9:37 ng gabi, Sabado (Abril 2), oras sa Italy. Kamakalawa, Abril 4, ating ginunita ang Kapistahan ng Pagpapahayag ni Anghel Gabriel kay Maria na siya ang magiging Ina ng Manunubos. Ang naturang Kapistahan ay ginugunita tuwing Marso 25, ngunit dahil sa ang Marso 25 ay Biyernes Santo, ipinagdiwang ito noong nakaraang Lunes.

Ano ang kaugnayan ng dalawang pangyayari? Una, nang tanggapin ni Maria ang pahayag ng anghel at ibinigay ang kanyang buong sarili ayon sa kalooban ng Diyos, naging Tao ang Anak ng Diyos na si Jesus -— isang napakadakilang pagpapahalaga at pagmamahal sa buong sangkatauhan. Ang pagkakatawang-tao ni Jesus, ganoon din ang kanyang pagpapakasakit, pagkamatay sa krus at pagkabuhay na muli ang nagpapatunay kung gaano kahalaga ang tao sa Diyos. At ang kahalagahang ito ng tao ang nakikita kong pinakabuod at saligan ng pagka-Papa ni Juan Pablo II.

Sa katunayan, ang kauna-unahang ensiklikal o "sulat" ng Papa sa mga mananampalataya ay pinamagatan niyang Redemptor Hominis (Ang Manunubos ng Sangkatauhan) na kung saan inilahad niya kung gaano kahalaga ang tao bilang kawangis at kalarawan ng Diyos, at sa gayon ay pinagbuhusan at pinaglaanan ni Jesus ng kanyang buong sarili at buhay – upang ang tao nga ay matubos sa kanyang kasalanan at kasamaan at mapanumbalik sa yakap ng Ama bilang mga anak ng Diyos.