Samantala, ngumangawa sa mga kuwago ng ORA MISMO, ang ilan sa mga may-ari ng lupang kabilang sa 193 ektaryang lupang tinirikan ng kastilyong nilumot sa tagal este mali Fantasy World pala, kasi up to now dehins pa daw yadba si Don Ching sa lupang binili. Sabi nga, napako ang mga pangako, he-he-he!
Dalawang beses tumawag sa 833-63-66 local-140 trunkline number ni Dong Ching ang mga kuwago ng ORA MISMO, para bigyan ito ng side upang maging patas naman ang ating reporting pero pirmi siyang wala. Totoo kaya ito?
May mga pangalang nakakausap sa telepono ang mga kuwago ng ORA MISMO tulad ng isang nagpakilalang Carlos tinawagan ng mga kuwago ng ORA MISMO, dakong alas-2:20 ng hapon kahapon, wala raw ang ating hinahanap kasi may meeting sa labas pero i-verify natin sa mga assets natin sa loob mismo ng tanggapan ni Don Ching ay wala naman daw ganoon klaseng gago este mali tao pala. Sa madaling salita, mukhang binola tayo ni Carlos. Tama ba si Mr. Boy?
Kaya duda ang mga kuwago ng ORA MISMO, na sanay makipag-lokohan ang kampo ni Don Ching. Binibigyan ng mga kuwago ng ORA MISMO, ng pagkakataon si Don Ching para masagot niya ang mga inilalabas sa ORA MISMO, pero mukhang ayaw niya. Bahala siya hindi niya tayo masisisi, di ba? Kung ayaw mong sagutin ang mga balita ng mga kuwago ng ORA MISMO, wala akong magagawa, Don Ching!
Alam n’yo, folks, hindi pa natatapos ni Don Ching ang obligasyon sa kanyang mga parokyano diyan sa kastilyong nilumot sa tagal este mali Fantasy World pala, ay pumasok naman ito ng ibang proyekto sa government construction projects. Bigtime ang pinasok nitong negosyo sa gobyerno, hindi biro! Tama ba Don Ching?
Malakas daw kasi si Don Ching kay Mr. Fat Goat diyan sa Palasyo kaya nakakuha at pinangakuan pa raw ng mga magagandang projects. Totoo kaya ito?
‘‘Bubusisiin ng mga kuwago ng ORA MISMO, ang iba pang proyekto ni Don Ching sa pamahalaan kung mayroon man,’’ anang kuwagong sepulturero.
‘‘Hindi pa nga tapos ang problema nito sa kastilyong nilumot este mali sa Fantasy World pala sa ibang project naman siya pumasok,’’ sabi ng kuwagong SPO-10 sa Crame.
‘‘Marami kasing tsapit si Don Ching kaya kahit saan niya gustong mag-negosyo puwede?’’ nagtatawang sabi ng kuwagong urot.