Katinuod sa hulga
Dihang gibalikbalik og sulti ni Bise Presidente Sara Duterte nga wala siyay laing gisaligan gawas sa katawhan, naapil sa wala saligi mao ang 431 niya ka security escorts. Nga naglakip sa 400 ka mga opisyal sa Armed Forces of the Philippines (AFP) ug 31 ka opisyal sa Philippine National Police (PNP).
Tinuod g’yud tingali nga wala siyay salig kay sila ang gikuyog sa pag-surender niya sa Quezon City Regional Trial Court niadtong Sabado ug sa 91 ka adlaw niyang mga biyahe sa nagkalainlaing kanasuran sa kalibotan sa 2025 ug 2026.
***
Ambot nganong lisod para ni VP Sara ang pagsabot nga sa pagpangayo ug pagdawat og seguridad gikan sa AFP ug PNP sama ra nga iyang gi-boluntaryo paghatag ngadto sa gobyerno sa tanang kasayuran sa mga lakaw sa tibuok niyang pamilya, apil nang nahimutangan sa ilang mga panimalay sa Davao ug Metro Manila.
Maong wala kinahanglanang i-surveillance ni Interior Secretary Jonvic Remulla si VP Sara ug iyang mga anak. Igo ra niyang basahon ang reports sa police escorts ni VP Sara ngadto sa PNP nga ubos sa superbisyon sa DILG.
***
Kon nagduda si VP Sara nga nagplano ang mga puwersa sa gobyerno sa pagpatay niya nganong padayon man siyang nagpahimulos sa security services sa AFP ug PNP (nga gigastohan og minilyon ka pesos sa buhis sa katawhan)?
Nganong wala man dayona ang dugay nang gipahibawo niyang plano nga pagkuha og pribadong security experts nga kasaligan nga dili g’yud magpagamit sa iyang gihulagway nga kawatan ang administrasyon ni Presidente Ferdinand Marcos Jr.?
***
Laing pasangil nga wala matarung paghunahuna ni VP Sara: Nga dunay mga hulga batok niya sukad 2023. Kon tinuod ang mga hulga, nganong wala man siya mopasaka og kaso? Nganong siya man hinuoy nanghulga nga ipapatay ang presidente, first lady, ug kanhi House speaker?
Unang mahibawo sa hulga batok niya mao ang security escorts sa AFP ug PNP. Nga kinahanglang mo-alerto dayon sa ilang mother units aron kapanalipdan gikan sa hulga si VP Sara ug iyang pamilya. Pero ang kadagkoan sa AFP ug PNP walay detalye sa mga hulga. Sa ato pa, posibleng si VP Sara ray nahibawo nga dunay hulga batok niya.
- Latest
