Nagbaha nga bilyones
Dili si kanhi Department of Public Works and Highways (DPWH) Secretary Manuel Bonoan ang unang nibisto sa leadership fund nga nihatag og higayon sa mga sakop sa Kongreso paglista sa mga proyekto para sa nasudnong budget.
Si kanhi DPWH Undersecretary Roberto Bernardo, ang unang state witness sa gobyerno batok sa mga kawatan sa flood control scandal, mas daghan og detalye sa binuang nga pundo. Nga gibasol sa pagsulbong sa labing dakong kinawatay sa kasaysayan.
-o0o-
Gibutyag ni Bernardo atubangan sa Senate Blue Ribbon Committee sa niaging tuig ang mosunod:
Gisugdan ni anhing DPWH Undersecretary Catalina Cabral ang pundo aron wala nay kongresista ug senador nga magbagulbol nga wala maapil ang ilang mga proyekto;
Ang gitawag ni Bonoan nga leadership fund ginganlan ni Cabral og allocables ug non-allocables base sa parametric formula nga si Cabral ray nakasabot; ug
Labing menos tagsa ka bilyon ka pesos ang nadawat sa kada kongresista ug senador nga suod sa administrasyon, mas dako ang nakuha sa mas sikit sa Malakanyang.
-o0o-
Gilista sa Philippine Center for Investigative Journalism (PCIJ), ang allocables ug non-allocables sa mga kongresista sa Sugbo:
Peter John Calderon (ikapitong distrito): P14.2 bilyones;
Rhea Gullas (unang distrito): P13.9 bilyones;
Pablo John Garcia (ikatulong distrito): P7.4 bilyones;
Duke Frasco (ikalimang distrito): P7.3 bilyones;
Edu Rama (Cebu City south): P7 bilyones;
Janice Salimbangon (ikaupat nga distrito): 6.4 bilyones;
Cindi Chan (Lapu-Lapu): P6.3 bilyones;
Lolypop Ouano (Mandaue): P5.6 bilyones;
Daphne Lagon (ikaunom nga distrito): P5 bilyones;
Cutie del Mar (Cebu City north): P4.8 bilyones; ug
Edsel Galeos (ikaduhang distrito): P4.7 bilyones.
-o0o-
Kon tuohan si Bonoan, ang mosunod nga mga senador nisumiter og lista sa mga proyekto para sa 2025 budget: Robin Padilla, Loren Legarda, Raffy Tulfo, Win Gatchalian, Chiz Escudero, Mark Villar, Alan Peter Cayetano, Migz Zubiri, Joel Villanueva, JV Ejercito, Risa Hontiveros, Jinggoy Estrada, Cynthia Villar, Grace Poe, Bong Go, Pia Cayetano, Bato dela Rosa, Sonny Angara, Lito Lapid, Imee Marcos, Francis Tolentino, Koko Pimentel, Bong Revilla ug Nancy Binay.
Dili krimen ang paglista og mga proyekto. Ang pagdemanda og kickback maoy kasohan. Pero isip mga magbabalaod nganong manghilabot man sila sa mga proyekto?
- Latest
