Immunity ni VP Sara
Tungod sa pagpasaka sa Department of Justice (DOJ) og mga kasong grave threats batok ni Bise Presidente Sara Duterte sa Quezon City Regional Trial Court, masaligon ang iyang mga kaatbang nga:
Luwatan na siya og arrest warrant karong semanaha;
Dakpon siya, kuhaan og mug shot, bulitan og tinta ang tanang mga tudlo, sa dili pa maka-piyansa para sa temporaryong kagawasan;
Kinahanglan nang mananghid sa korte sa dili pa makabiyahe sa The Hague ug ubang kanasuran; ug
Mapugos siya sa pagtambong sa mga husay sa korte ug posibleng makonbikto ug mapriso.
-o0o-
Pero iyang mga dumadapig andam na sa ilang depensa:
Impeachable official si VP Sara, sama ni Presidente Ferdinand Marcos Jr., mao nga dili siya mahimong kasohan sa ordinaryong korte gawas sa Senate impeachment court;
Dili mahimong husayon sa korte ang mga kasong grave threats kay naapil sa usa sa upat ka articles of impeachment batok ni VP Sara sa nagpadayon nga impeachment trial; ug
Mahusay lang si VP Sara sa ordinaryo nga korte kon ma-konbikto human sa impeachment trial ug kapahamtangan sa silot nga pagkalagpot gikan sa iyang puwesto.
-o0o-
Giila sa 1987 Constitution ang impeachable officials nga matangtang lang sa puwesto pinaagi sa impeachment: Presidente; Bise Presidente; Chief Justice ug Associate Justices sa Korte Suprema; mga sakop sa Civil Service Commission, Commission on Elections ug Commission on Audit; ug Ombudsman.
Pero ang presidente ray ginganlan sa konstitusyon nga dunay immunity from suit. Maong dunay mga eksperto nga nagtuo nga mapasakaan si VP Sara og kaso nga ang silot wala maglakip sa pagtangtang sa katungdanan.
-o0o-
Dihang siya pay justice secretary ni anhing Presidente Noynoy Aquino, si Kongresista Leila de Lima niluwat og legal opinion nga mahimong kasohan og plunder si kanhi Bise Presidente Jejomar Binay niadtong 2015. Pero wala moabot sa Korte Suprema ang kontrobersiya.
Niadtong 2019, ang administrasyon ni kanhi Presidente Rodrigo Duterte nipasaka og kasong sedition batok ni kanhi Bise Presidente Leni Robredo, uban nilang de Lima ug kaubanan. Nahikawan ang Korte Suprema sa kahigayonan paghusay sa kontrobersiya kay wala mo-invoke si Robredo ug immunity sa iyang tubag sa kaso. Gibasura sa korte ang kaso tungod sa kakuwang og ebidensiya.
- Latest
