Pakauwaw sa The Hague
Wala kaila si Bise Presidente Sara Duterte og Pax Silica. Tingali kay nalingaw sa iyang biyahe. Nga nipalingkawas niya sa impeachment trial ug ubang labad sa ulo sa Pilipinas. Gawas pa, social media posts sa iyang suod nga mga higala nagpakita nga mas interesado siya sa hair color. Ug sa pipila ka media interviews nipahibawo sa dakong importansiya, para niya, sa skin care.
Pero gipresentar ang iyang kaugalingon nga mas takos nga alternatibo sa presidente. Makapabalaka nga wala siyay alamag sa kinadak-ang proyekto sa negosyo, seguridad ug diplomasiya sa nasud.
-o0o-
Wala pakauwawi sa media si VP Sara sa iyang kakuwang og kasayuran sa Pax Silica. Gani, dili reporter kon dili iyang dumadapig sa The Hague ang nangutana parte sa alkontra sa Estados Unidos sa pagdominar sa China sa artifical intelligence ug teknolohiya.
Labaw nang walay tuyo ang dumadapig sa pag-insulto ni VP Sara. Mahimong nihatag lang niya og kahigayonan sa pagbunal ni Presidente Ferdinand Marcos Jr. nga nagpaluyo sa proyekto. Nasobrahan tingali ang iyang pagsalig sa katakos ug kinaadman ni VP Sara sa seryusong mga diskusyon sa nasudnong interes.
-o0o-
Pero nakabawi si VP Sara. Ang kakuwang sa pagtuon parte sa Pax Silica natapakan sa kasuhito unsa kabarato ang pinatyanay sa Pilipinas. Gihimong sampol nga kon mangabit ang iyang bana P5,000 ray bayad sa pagpapatay sa kabit.
Gawas nga dili malipay si Atty. Mans Carpio, mas maguol ang defense lawyers sa impeachment trial. Kay gipalig-on ni VP Sara ang pasangil nga nangontrata siya og hitman batok sa presidente, first lady ug kanhi House speaker.
-o0o-
Human niangkon nga dili katabang ang ilang rallies pagpalingkawas sa iyang amahan, nidiskurso si VP Sara pagpasangil sa International Criminal Court (ICC) nga itoy nilang kanhi Senador Antonio Trillanes ug Marcos Jr. kay kaso rang kanhi Presidente Rodrigo Duterte ang gihuptan.
Gawas sa kaso ni Duterte, gidumala sa ICC ang mga kaso sa Ukraine, Gaza, Libya, Myanmar, Congo, Central African Republic, Mali ug Darfur/Sudan. Kon wala kadiktar sa ICC nilang Donald Trump, Vladimir Putin ug Benjamin Netanyahu, lisod tuohan nga magpagamit ang ICC ni Trillanes (nga walay puwesto sa gobyerno) ug Marcos Jr. (nga iyang gihulagway nga bangag).
- Latest
