Human sa SONA

Naibanan ang akong pagduda nga paukyab ang mga kasong kriminal ni kanhi House speaker Martin Romualdez nga ipaubos na sa preliminary investigation sa Ombudsman. Dihang nabisto ang kalapad sa ilang imbestigasyon giunsa pagtago ang gidudahang kabahin sa ?56 bilyones nga kickback sa flood-control scandal.

Dili lang diay affidavits sa kanhi marines nga nangangkon nga nihatod sa mga maleta sa kuwarta ang gipasikaran sa mga kaso. Dunay posibilidad nga bisan si Romualdez, ig-agaw igtagsa ni Presidente Ferdinand Marcos Jr. ug suod ni Ombudsman Boying Remulla, tininuod ang imbestigasyon batok niya.

Gipasanginlan sa Ombudsman ang mosunod nga tulo ka labing sinaligan ni Romualdez nga maoy nitago sa iyang pagpanag-iya sa binilyon ka pesos ug sa kabtangan nga napalit:

Jocelyn Sereño, gipasanginlang tigdawat sa mga maleta sa kuwarta sa iyang mga balay sa Forbes Park (walay kuwarta nga si Romualdez ang nangunay pagdawat);

Atty. Jose Raulito Paras, iyang fraternity brother nga gipasanginlang agresibong namalit og kabtangan sa Pilipinas, Espanya, ug ubang kanasuran; ug

Atty. Hermogene Real, opisyal sa mga kompaniya ni Romualdez nga giingong maoy nitiwas sa kasagaran sa mga transaksiyon.

Gipasanginlan sa Ombudsman ang mga kompaniya nga gitukod nilang Romualdez ug Paras aron pagtago sa mga transaksiyon: Golden Pheasant Holdings Corp., Clearspring, ug Braavos Corp.

Giila sa Ombudsman ang ubang kakonsabo sa mga transaksiyon: APP Law, ang law firm ni Paras; D.S. Tantuico & Associates ni Atty. Real; Samchan Foreign Exchange Corp., nga giingong nihimong dolyar pero nibalik ra sab sa peso sa kinawat nga kuwarta; ug Cecil Property sa Singapore, nga nipalit sa kabtangan sa Sotogrande sa Espanya.

Unsaon pagkahibawo nga seryuso si Remulla sa pagpapriso ni Romualdez sa mga kasong plunder ug money laundering? Atong panid–an unsay mahitabo human sa State of the Nation Adress gahapon.

Mapasaka gani ang mga kaso sa Sandiganbayan (bisan sa hulga ni Romualdez nga ibisto ang tanan niyang nahibaw-an) ug maposasan siya ug dili makapiyansa, tinuod nga nagsinunogay na sila og taytayan. Pero kon hasta ang gipasalig nga preliminary investigation sa Ombudsman dili mahitabo, ulog-ulog ra kining tanan. Ug bantay silang Marcos Jr., Remulla ug kaubanan: Dili sila pasayluon sa masuk-anon nga katawhan.