“Shout out 01K nga mga suki!”

Susama na lang gyud sa segarilyo ug kendi ang pagpamaligya og shabu karong panahona. Ug kadtong mga tawo nga abi nimog yano lang nga makililimos o nag-istambay sa kadalanan, sila na diay karon ang bag-ong nawong sa shabu vending!

Pastilan naman lang gyud kong atong analisahon ang gibutyag sa usa ka 42-anyos nga babaye nga nadakpan atol sa buy-bust operation sa National Bureau of Investigation (NBI-CEVRO) niadtong miaging semana.

Sa ako mismong paghinabi sa maong suspek, nakapang-ingon gyud ko nga ingon na diay niini ka grabe ug katipang ang sitwasyon sa kadalanan.

Duha-duha paman gani niyang gi-“shout out” ang iyang mga suki sa shabu—mga drayber sa pampublikong sakyanan, labina sa rota nga 01K! Murag lang gyud og kendi nga ilang hapiton ang drugas sa dili pa o inagihan sa ilang pagbiyahe. Ka delikado ba sa mga pasahero!

Ang maong babaye, sa unang tan-aw, mora'g tawong aseras lang nga naglingkod sa usa ka bakanteng gasolinahan sa Sambag Uno—atbang mismo sa South Bus Terminal ug pwerteng duol sa mga tunghaan. Dili gyud kadudahan sa unang tan-aw nga shabu diay ang iyang gitinda sa iyang atbang.

Apan nalit-ag siya sa mga maayong operatiba sa NBI-CEVRO. Walay lipod-lipod nga nisuka ang babaye sa tanang detalye, lakip na ang pagbutyag sa iyang mga suki.

Tungod niini, gisusi karon sa NBI ang posibilidad nga dunay mas dakong sindikato nga naggamit ug mga tawong nagpaka-aron-ingnon nga makililimos o "tawong grasa" aron mahimong pantalya ug dili masigpatan sa mga otoridad.

Ingon na ba gyud niini ka grabe ug kadali ang suliran sa ilegal nga drugas karon? Matud pa sa suspek, pwerteng sayora ra kuno alang kaniya ang makapangumpra og shabu sa Duljo Fatima—nga kuno murag merkado lang ang senaryo sa palitay.

Dili na ikabuhong nga daghang krimen sa palibot ang nahitabo tungod kay usa sa pinakadakong paktor mao gyud ang ilegal nga drugas.

Mas samot nga nakapanakit sa ulo ug nakapabalaka kay base sa imbestigasyon sa NBI, dili lang drayber sa PUJ nga 01K ug mga bus ang suki sa babaye—apil na pati mga estudyante!

Murag nahimong karenderiya sa shabu ang dapit nga gipuy-an sa babaye nga gidugok sa mga nagumon sa bisyo.

Busa, kong tinuod man gani ang pagbutyag sa babaye nga daghang drayber ang iyang suki, mabutang gyud sa dako nga peligro ang kinabuhi sa liboan ka mga pasahero ug pedestrians matag adlaw.

Unsaon na lang kun ang nagmaneho sa pampublikong sakyanan wala na sa sakatong panumduman samtang nagbiyahe?

Maayo pa tingali nga aksyonan dayon kini sa LTO, LTFRB, ug sa lokal nga gobyerno: i-mandatory drug test silang tanan!

Kini aron mailhan, matangtang sa kalsada, ug malikayan ang dugang trahedya ug kadaut sa katawhan.

Angayan gyud nga seryosohon sa kagamhanan ang pagsumpo sa problema sa drugas nga mora’g nibalik na sab ug mas migrabe pa karon.

Unsa man ka grabe? Ikaw mismo nga nakatalaid sa kalsada matag adlaw ang makatubag niana.

Dili na gyud kita pwedeng magkompiyansa karon. Kadtong mga tawo nga nagpaka-makililimos o naglaroy-laroy sa aseras, dako ang posibilidad nga sila na diay ang tulay sa drugas gikan sa mga drug capitalist padiretso ngadto sa mga drug consumers.