Tighatud og shabu, nadakpan

CEBU, Philippines — Usa ka High-Value Individual (HVI) sa regional level ang nadakpan sa hiniusang buy-bust operation sa  Mandaue City Police Office (MCPO) ug Philippine Drug Enforcement Agency Regional Office 7 (PDEA-7) sa Barangay Canduman, Mandaue City, Biyernes sa gabii, Hulyo 10.

Ang nadakpan giila nga si alyas "Pokyol," 31, residente sa Sitio Antipolo, Barangay Jugan, Consolacion.

Matud pa ni alyas "Pokyol" nga courier lamang siya sa ilegal nga droga ug  gisuholan ra siya og P2,500 matag maka-deliver. Dugang pa niya, duha hangtod tulo ka higayon matag bulan siya makadawat og sugo sukad niadtong Marso.

Sumala sa MCPO, nahitabo ang operasyon alas 8:45 sa gabii sa Zone 1 CCF, Barangay Canduman gipangulohan kini sa City Intelligence Unit (CIU) ug City Drug Enforcement Unit (CDEU) sa MCPO sa koordinasyon sa PDEA-7.

Nasakmit gikan sa suspek ang 12 ka pakete sa gituohang shabu nga adunay gibana-banang timbang nga 500 gramos ug adunay Standard Drug Price (SDP) nga mokabat sa P3.4 milyon.

Matud pa sa kapulisan, ang operasyon sa suspek naglakip sa Mandaue City, Consolacion, Liloan, Danao City, San Fernando, ug Lapu-Lapu City. (BANAT NEWS)