Walay mapili nila

Kon gisilotan pa lang unta ang tanang naka-apil sa flood-control scandal nga gibisto ni Presidente Ferdinand Marcos Jr. sa iyang State of the Nation Address (SONA) tangkod nga usa ka tuig ang nilabay karong buwana, dili unta makapasalipod ang iyang mga kaatbang sa mas dakong kawat nga wala imbestigaha aron pagdupa ni Bise Presidente Sara Duterte nga gipasanginlang nibolsa sa confidential funds ug nitago sa binilyon ka pesos gikan sa ilegal nga mga tinubdan.

Pero ambot kon unsa na lay mahibilin sa iyang administrasyon. Kon magpabilin pa sa gahom.

Kon gitinuod pa sa pag-imbestigar, pagkiha ug pagpriso ang tanang gipasanginlan nga nakabahin sa gibanabana nga ?1.7-trilyones nga nakawat sa flood-control projects sa niaging 10 ka tuig:

Ambot pila na lang ka kongresista ang nahibilin sa puwesto aron sa pag-impeach ni VP Sara;

Ambot pila na lang ka senador ang wala pa mabalhog sa Quezon City Jail ug modumala sa impeachment trial;

Ambot pila na lang ka sakop ang mahibilin sa Gabinete; ug

Ambot dili ba mapalayas si Marcos kon masakpan nga maoy labing dakong kawatan.

Ambot unsay gihunahuna ni Marcos sa iyang pagtulisok nga “Mahiya naman kayo!” sa mga senador ug mga kongresista nga nitambong sa SONA sa niaging tuig. Naneguro ba lang nga dili mahiagom ang iyang administrasyon sa nasudnong kasuko batok sa pangurakot nga niresulta sa duguong kaguliyang sa Indonesia ug Nepal sa niaging tuig?

Nisalig ba nga ang kasuko masentro sa kurakot nga mga alyado ni kanhi presidente Rodrigo Duterte? Wala bay nakahunghong nga mas makalilisang ang kawat sa iyang administrasyon?

Maong bisan ang gamhanang makinarya sa propaganda sa Malacañang maglisod pagtubag sa binuang nga depensa sa mga dumadapig ni VP Sara nganong giinitan ang minilyon ka pesos niyang confidential funds pero gipasagdan ang binilyon ka pesos nga flood scam.

Kay ang labing epektibong tubag mao nga angayng imbestigahon ug silotan ang tanang responsable sa tanang kawat, ma-Marcos, ma-Duterte, o ma-Romualdez man. Kon mao, nganong mas paspas man ang irog sa mga kaso batok nilang Jinggoy Estrada, ug Rodante Marcoleta kay sa mas nag-unang mga kaso batok nilang Martin Romualdez, Chiz Escudero, ug Joel Villanueva?