Trahedya sa mga bata
Dihang napukaw ang mga bata sa mga buto-buto sa tungang gabii nga gisundan sa lanog nga minatay sa mga sakop sa silingan nilang pamilya kansang amahan o inahan gidudahan nga durugista, gisaka ug gitokhang sa wala mailhi nga armadong mga lalaki, unsa kahay nasulod sa ilang hunahuna?
Nga mahimo rang ihawon si bisan kinsa? Nga dili gani tarungon sa pagpahibawo unsay pasangil batok nila? Nga walay bisan unsang kaso nga gipasaka sa piskaliya ug sa korte? Ug labaw na nga wala hatagi og higayon nga makapanalipod sa ilang kaugalingon?
-o0o-
Dihang namat-an nila sa pagkabuntag ang nangligdas nga mga patayng lawas sa kadalanan, gitabonan lang og mga karton nga niila nilang mga adik, nga morang mao ray katin-awan sa bangis nga sentensiya nga gipahamtang batok nila, unsa kaha intawon ang ilang nabatyagan?
Nga walay dag-anan kon mapasanginlan? Nga mirisi ang mga nagbisyo sa drugas? Nga tawgon lang og demalas ang naangin nga mga inosente, labi nang sama nilang mga bata, nga wala pay igong kabuot sa pagtugkad nga ang balaod manalipod ra sa mga hawod ug dili nilang mga gagmay?
-o0o-
Unsa man ang mensahe nga nasabtan sa linghod nilang mga panghunahuna? Dihang nihilom ang ilang mga ginikanan ug ubang dagko nga mga silingan? Morang nagkasabot sa pagtak-om sa ilang baba ug pagluom sa ilang mga pangutana sa duguong mga panghitabo?
Unsa man intawon ang epekto ngadto sa mga bata dihang ilang nabantayan nga bisan wala mouyon ang ilang mga silingan sa bangis nga pangabuso, napugos sa pagpangiyugpos tungod sa kahadlok nga silay sunod nga lubaon?
-o0o-
Sa pagpanligid sa katuigan nga walay hustisya ang mga biktima, nga wala masiloti, wala gani imbestigaha ug wala ikiha ang mga responsable, kay gidudahan nga mga polis, nga imbes disiplinahon ilang nadunggan nga gibayran ug gi-promote na hinuon, unsa man ang mga pagtulon-an nga napupo sa nagtubo nga mga bata?
Hinaot nga dunay nakatambag ug nakapasalig nila nga ang katarung sa kapulihay, bisan unsa kalangay, mopatigbabaw batok sa kadaotan. Hinaot nga dili masaag sa panghunahuna nga ang pait nga kasinatian magamit nga lisensiya. Aron nga kon makaangkon og kahigayonan mahimo sang kumuton ang balaod sa ilang kaugalingong mga kamot.
- Latest
