Ungo ni Imee

Si Senador Imee Marcos morang nipakita og ungo atol sa sesyon sa Senado niadtong Lunes sa hapon. Iyang ungo nipasangil nga nagplano ang administrasyon sa iyang manghod nga si Presidente Ferdinand Marcos Jr. sa paglugway sa pagkanselar sa eleksiyon sa 2028 ug paglugway sa ilang mga termino hangtod sa 2031.

Dihang nibarog ang iyang kaubanan nga niprotesta nga ang iyang mga pasangil bakak ug taphaw, gibakwi ra sab dayon niya ang ungo. Bastos niyang duwa dili makatabang sa pagbanhaw sa kaligdong sa Senado ug pagkuha pagbalik sa pagsalig sa publiko.

Laing nabisto sa pakauwaw ni Imee: Luag ang panaghiusa sa bag-ong majority bloc sa Senado. Trese sila ka buok pero duha ra ang nisuporta ni Imee. Sila rang Rodante Marcoleta ug Robin Padilla ang nisupak sa mosyon ni Migz Zubiri sa pagpapas sa video gikan sa rekord sa Senado.

Ambot nikonsulta ba sa iyang kaubanan o, sama sa naandan, nagtuo si Imee nga makalusot ang iyang salida. Si Senate President Alan Peter Cayetano, nakakita tingali nga wala silay igong numero, maoy niawhag ni Imee sa pagbakwi sa iyang video.

Kon dili kapugong sa ilang kaugalingon silang Imee ug kaubanan sa paghimo sa susamang salida sa umaabot nilang mga sesyon, ug simbako hasta sa impeachment trial ni Bise Presidente Sara Duterte nga gitakdang sugdan na unya sa Hulyo 6, mosamot na g’yud og unlod ang imahe sa institusyon.

Hinaot nga makumbinser ang mayoriya, bisan ang mga nalubong sa ilang kaugalingong mga eskandalo, nga mas importante ang pagpreserbar sa Senado kay sa ilang pamolitika.

Pero nilampos ang mayoriya --ambot kon dili ba maoy tinuod nga tuyo sa ungo-ungo ni Imee-- sa paglipat sa grupo ni Minority Leader Tito Sotto. Wala na mahisguti ang dinaliang panginahanglan sa pagsusi sa pagpamusil sulod sa Senate building niadtong gabii sa Mayo 13, nga nataliwad-an sa pagdupa ug pagpa-ikyas ni Bato dela Rosa.

Kapait kon mao na ni ang Senado sa atong panahon. Imbes manalipod sa interes sa nasud ug sa katawhan, mahimo na hinuon nga laing tinubdan sa kauwawan. Imbes magsilbing sentro sa makiangayon nga pagtubag sa mga panginahanglan sa katawhan, mahimo na hinuon nga laing hulga sa kaguliyang.