Sara walay ikatubag?
Dili mabasol si Bise Presidente Sara Duterte sa pagdumili pagtubag sa mga pasangil batok niya. Dili tungod kay kumbinsido nga politikanhong pagpanggukod ang iyang nahiagoman. Kon dili tungod kay wala siyay ikatubag.
Sa walay paghisgot sa ubang articles of impeachment, maglisod pagpanalipod ang iyang kaugalingon gikan sa nadokumento nga pataka nga mga gasto sa iyang ?612.5 milyones nga confidential funds sa 2022 ug 2023, nga niabot og ?500 milyones sa Office of the Vice President (OVP) ug ?112.5 milyones sa Department of Education (DepEd):
Dunay mga resibo ang Commission on Audit (COA) nga nigasto siya og ?16 milyones pag-abang og safe houses (ambot kinsay gipapuyo) nga ang pipila gi-presyohan og ?250,000 kada adlaw --mas mahal pa kay sa five-star hotels;
Kumplito sab sa papeles ang COA sa iyang pagpamalit og ?199 milyones nga supplies ug mga tambal nga walay bisan unsa nga katin-awan unsay labot sa gipasiugdahan nga surveillance operations;
Nigasto sab siya og ?62 milyones sa "rewards" nga walay ebidensiya unsay kapuslanan sa unsa nga mga proyekto nga wala sab maklaro kon malampuson bang napatuman;
Napamatud-an sab sa COA ug Philippine Statistics Authority nga 1,322 sa nakadawat sa confidential funds sa OVP (gipangulohan ni Mary Grace Piattos) ug 405 ka ngalan sa nakadawat sa confidential funds sa DepEd walay rekord sa pagkatawo, pagkaminyo, o pagkamatay (gitugotan ang paggamit og alyas pero kinahanglang ilista ang tinuod nga mga ngalan sa selyado nga ledger nga tagoan sa vault sa COA);
Nahurot ang ?125 milyones nga confidential funds sa OVP sa 2022 sulod lang sa 11 ka adlaw (mas lisod ipasabot human sa testimoniya ni Ramil Madriaga nga gi-apud-apod niyang kuwarta sa classmates ug mga higala ni VP Sara sulod lang sa 18 ka oras); ug
Gisugo sa COA si VP Sara pag-uli sa ?73.28 milyones sa confidential funds sa 2022 ug ?375 milyones sa confidential funds sa 2023 kay nasubay nga gihatag sa iyang disbursing officers (nga maoy gitugotan nga modumala sa pundo) ngadto sa mga opisyal sa Vice Presidential Security and Protection Group nga silang Koronel Raymund Dante Lachica ug Koronel Dennis Nolasco (nga wala tugoti sa balaod).
- Latest
