Hilas nga hilak

Gawas sa luod nga acting ug sa hilas nga hilak sa mga sakop sa majority bloc sa Senado sa niaging duha na ka semana, dunay mas balido nga mga sukaranan ang publiko sa pagduda sa ilang kamatinud-anon:

Wala mapasabot ni Senate President Alan Peter Cayetano hangtod karon unsay kahulogan sa ilang Senate protective custody ni Bato dela Rosa, pag-kustodiya ba niya hangtod nga mahukman sa Korte Suprema ang iyang pagkuwestiyon sa arrest warrant sa International Criminal Court (nga maoy pagtuo ni National Bureau of Investigation Director Melvin Matibag) o pagbabag lang kadto sa NBI sa pagpatuman sa warrant hangtod nga naka-ikyas si dela Rosa (nga mao na karoy gidudahan sa kadaghanan);

-o0o-

Wala matubag ni Cayetano ang pangutana ni Senador Erwin Tulfo nganong ang iyang imbitasyon para sa tigom sa tanang senador human sa sesyon niadtong Miyerkules, Mayo 13, iyang giusab ngadto sa tigom sa majority bloc na lang (nga maoy tinuod nga rason nga niuli og sayo ang minority bloc, dili tungod sa pasangil ni Cayetano nga nakadawat sila og abanteng kasayuran sa pagpamusil nga nahitabo niadtong gabhiona);

Wala tubaga ni Senador Pia Cayetano ang katin-awan ni Erwin Tulfo nga dili tinuod nga wala mangumusta ang taga minority bloc sa ilang kahimtang human sa butobuto sa Senado kay nipadala diay siya, si Kiko Pangilinan ug si Bam Aquino og mga mensahe sa group chat sa tanang mga senador sa WhatsApp ug gani gitubag silang Camille Villar nga okay rang ilang kahimtang;

-o0o-

Samtang balido ang ilang kahadlok atol sa aktuwal nga butobuto, walay bisan usa sa taga majority bloc ang nipadayag og kahimangod, wala say nakakita og panginahanglan paghimo og ilang kaugalingong imbestigasyon, bisan nabisto na nga ilang kaugalingong sergeant-at-arms nga si retired general Mao Aplasca maoy unang nagpabuto, nga mga guwardiya sa Senado ang responsable sa 39 sa 44 ka buto ug nga walay plano ang NBI sa pag-atake sa Senate building; ug

Wala sab mapasabot nilang Cayetano ug kaubanan nganong bisan sa grabeng kahadlok sa butobuto, nga si Pia nagtuong mangamatay na sila, wala man mobalhin sa mas luwas nga lugar, hinunoa nagpabantang na man hinuon sa ilang Facebook Live ug mapahiyumon nga nangaon ug nag-selfie.