Way mapriso sa Mayo

Nganong nituo ko sa pasalig ni Ombudsman Boying Remulla nga pasakaan na og kasong plunder silang kanhi House speaker Martin Romualdez ug kanhi Senate president Chiz Escudero karong ting-init (kay sa niaging buwan man nisaad, posibleng Mayo ang iyang gipasabot kay tinguwan na sunod buwan):

Nideklarar nga ang ikaduha niyang kinabuhi (human nakalingkawas sa operasyon sa kasingkasing ug leukemia) igahin sa pagtuman og mas halangdong mga tahas kay sa iyang naandan nga pamolitika;

-o0o-                                                                                       

Gihulagway ni retired Supreme Court senior associate justice Antonio Carpio ang iyang puwesto pagka ombudsman nga ikaduha nga labing gamhanan sunod sa pagka presidente kay maka-imbestigar siya sa bisan unsang anomaliya ug ni bisan kinsang nag-abuso sa gahom;

Nisaad sa iyang kaubanang gradwado (apil nang gitahud niyang mga propesor) sa University of the Philippines niadtong Nobyembre nga hatagan siya og unom ka buwan sa paghipos og mga ebidensiya batok ni Romualdez (nga gradwado sab sa UP) nga maoy iyang gituohan nga tinuod nga utok sa ?1.7 trilyones nga flood-control scandal (ug ang Mayo maoy ikaunom nga buwan human sa iyang saad);

Niangkon nga samtang lisod ang pagmatuod sa plunder masaligon siya nga makahipos og igo nga mga ebidensiya nga gitugotan ni Romualdez ang grabeng kinawatay aron pagpalig-on sa politikanhong base nga gilaoman nga motuboy sa iyang pangandoy nga mag-presidente sa 2028 (o mag-primero ministro kon mas sayo nga mausab ang 1987 Constitution);

-o0o-

Nikumpisal sa niaging buwan nga mas una nilang nahipos ang mga ebidensiya sa money laundering tungod sa nabistong pagpalit ni Romualdez og ?1.6 bilyones nga mansion sa Forbes Park sayo ning tuiga; ug

Nipasangil si Remulla nga binilyon ka pesos nga kinawat giwaswasan ni Romualdez pinaagi sa pagkompra og mga yuta ug kabalayan sa Pilipinas ug ubang kanasuran (ambot apil ba sa mga ebidensiya sa Ombudsman ang mga dokumento sa gikatahong pagpamalit ni Romualdez og prime commercial strips sa Banilad ug General Maxilom sa Cebu City nga tag-?2 bilyones kada usa ginamit ang dummy nga mga kompaniya).

-o0o-

Pero nabalaka kong wala pay kaso batok nilang Romualdez ug Escudero karong buwana.

Kay gipahibawo sa Sugbuanong Assistant Ombudsman Mico Clavano nga naa pa sa preliminary investigation ang mga kaso.