Mas mubo og sungay
Paboritong linya sa mga opisyal sa House of Representatives: Mas daghan ang ni-impeach ni Bise Presidente Sara Duterte karong tuiga (257) kay sa niaging tuig (215) tungod sa mas lig-on nga mga ebidensiya nga nahipos sa public hearings sa Justice Committee.
Dili nila angkunon nga nakatabang sa pagkuha sa suporta sa kapin sa 80% sa mga kongresista, bisan sa lapad nga panghudlat sa mga Duterte, ang pagsuspenso sa pagpasaka og mga kaso batok sa mga kongtraktor ug ubang gilambigit sa grabeng kinawatay sa ?1.7-trilyones nga flood-control scandal.
Nga posibleng mao say rason nganong nikalit og kamingaw ang imbestigasyon sa mga senador nga ginganlan sa eskandalo. Sa niaging tuig pang nipasalig ang Department of Justice ug Office of the Ombudsman nga hinog nang mga ebidensiya ug mapasaka sa Sandiganbayan bisan unsang orasa.
Gibalikbalik pa gani pagpasalig nga dunay mga senador nga mapriso sa wala pay Pasko 2025. Pero hangtod karon walay kasong napasaka batok nilang Joel Villanueva, Jinggoy Estrada, Nancy Binay, ug Chiz Escudero. Wala na say hisgot sa case build-up nilang Mark Villar ug Bong Go.
Pero samtang nagmalampuson ang kampanya sa House, napakyas sa Senado. Nabungkag ang majority bloc nga pabor sa Malacañang, napalagpot sa puwesto si Tito Sotto ug nipuli ang alyado sa mga Duterte nga si Senate President Alan Peter Cayetano.
Nga bisan sa makapakugang nga pagpakita ni Bato dela Rosa human sa unom ka buwan nga pagtago dili g’yud unta makakuha og 13 ka boto kon gidayon pa og priso ang lima ka umaabot nga senator judges.
Kapait kon tinuod ang mga pasangil nga aron pagseguro sa impeachment ni VP Sara sa House ug sa pagka konbikto niya sa Senate impeachment trial gimaniobra ang flood-control cases. Wala na bay laing paagi sa pagmatuod sa kaso sa grabeng kawat gawas sa pagtabla sa mga kaso sa mas dagkong mga kawatan?
Unsa man intawon ang mahitabo sa nasud ug sa katawhan? Kon pulos sungayan ang kapilian (kay mao ray dunay kahigayonan sa pagdaog sa 2028)? Nga mapugos sa pagsakripisyo sa panginahanglan sa kaligdong ug katakos kay kutob na lang sa pagpangita kinsay mas mubo og sungay?
- Latest
