Karaan nga pangilkil
Pagsugod nako og trabaho sa radyo, gitahasan ko sa pagsuwat ug pagsibya og news updates kada 30 minutos. Yano pa man ang newsrooms niadtong panahona, kinahanglan kong mosulod sa announcer’s booth, mopuli sa lingkoranan ug mogamit sa mikropono sa mga komentarista aron pagtuman sa trabaho.
Nagkontrolar sa tanang kahimanan ang gi-atubang namo nga technical booth. Ang technician maoy mo-play sa program intros ug extros ug commercials, motubag sa landlines ug mo-senyas sa komentarista kon dunay caller nga moapil sa programa. O reporter nga dunay field report para sa akong segment.
-o0o-
Daghang blocktimers ang radio station nga una nakong gitrabahoan. Sila ang kasagaran nakong ikasugat sa booth. Nagbayad sila sa estasyon pinaagi sa ilang sponsors. Pipila nila dili pamilyar sa console maong akoy mo-abli ug mopawong sa mikropono para nila.
Usa niana ka higayon nagbarug ko sa technical booth kay nagpaabot sa akong turno, nadunggan nako ang blocktimer nga dako kaayo og tingog sa iyang kasulti sa telepono: “Sunga, paminaw ha, atakehon tika sa radyo! Tawgon tika ini’g ka human sa programa! Di gani ka mohatag, atakehon na sab tika ugma!”
-o0o-
Pagkahuman nako og balita, nipuli dayon dayon siya. Gisenyasan ko niya pagpawong sa mikropono. “Paminaw, Dong, unsaon nako paglaba tong Inseka!” Pag-abli nako sa mikropono, gituman dayon ang iyang pasidaan.
Nangutana ko sa technician kinsay kontra sa blocktimer. Niingon ang technician nga negosyanteng Filipino-Chinese sa downtown nga nibalibad sa pag-sponsor sa programa. Nisumbong ko sa station manager. Wala badlonga ang blocktimer. Didto ko nagsugod og kasabot nga lisod hilabtan ang naandan sa industriya.
-o0o-
Nabalaka ko nga mas komplikado nang mga transaksiyon tali sa badlungon nga mga sakop sa media ug sa mga negosyante ug mga politiko karon. Ambot duna pa bay mogamit og landline aron sa pagpanghulga. Mahimo ganing gilikayan na sab hastang text ug chat messages kay mahimong ebidensiya ang screenshots.
Ambot pilay gipangayo sa blocktimer sa akong kabatan-on. Pero nahadlok kong wala ra sa kumingking sa mas dakong presyo sa mga pag-atake ug pag-depensa karon. Uso pa bang pagbayad sa mga sakop sa media? O mas epektibo nang pagkontrata og organisado nang daan nga troll farms?
-o0o-
Kataphaw sa akong kasinatian kon ikumparar sa entrapment operation sa National Bureau of Investigation (NBI) nga nakasikop sa inilang media executive nga gipasanginlang nangilkil og P300 milyones gikan ni kanhi House Speaker Martin Romualdez.
Human nakapakita ang NBI sa mga ebidensiya, magpabilin pa bang influencers sa social media platform nga gi-organisar sa dinakpan? Kinsa nihulga nga kon dunay mahitabo nila, ipagawas ang video sa giingong maniobra sa pagpangawat ni Romualdez ginamit ang House of Representatives. Paabuton nato kon, sama sa karaang blocktimer, tinud-on bang pasidaan.
- Latest
