AMLC imbestigahon sab

Gusto nilang Bise Presidente Sara Duterte ug sa iyang bana nga silotan ang liderato sa Anti-Money Laundering Council (AMLC) tungod sa pagpahibawo sa House Justice Committee nga niabot og ?6.77 bilyones ang mga transaksiyon sa ilang bank accounts sugod sa 2007 hangtod 2026.

Mao nay tuyo sa mga kasong gipasaka ni Atty. Manases Carpio sa Quezon City Prosecutor’s Office gahapon. Pero ang bag-ong liderato AMLC igo lang nagtuman sa ilang trabaho. Mas angayan nga imbestigahon ang nangaging mga liderato sa AMLC nga wala mobaraw sa kadudahan nga mga transaksiyon.

Ambot naanad ba lang nga gipatuyangan ang ilang mga transaksiyon sukad sa pagkapili ni VP Sara nga bise mayor sa Davao City sa 2007 ug mayor sa 2010 ug 2016 hangtod na-bise presidente sa 2022.

O, kay desperado pagtabon sa ilang sekreto, wala makatarung pagtuon sa Anti-Money Laundering Act (Republic Act 9160). Nga nideklarar nga ang pagsumiter sa mga bangko sa covered transaction reports (CTRs) ug suspicious transaction reports (STRs) ngadto sa AMLC dili kalapasan sa Secrecy of Bank Deposits Law (RA 1405).

Niadtong 2007, gidominahan sa mga tinudlo ni kanhi presidente Gloria Arroyo ang AMLC nga gipangulohan ni Vicente Aquino. Pagka-2013, nipuli si Julia Baclay-Abad. Kinsa ni-resign sa 2017 kay gihasi ni kanhi presidente Rodrigo Duterte human gibisto ni kanhi senador Antonio Trillanes ang ?2.4 bilyones nga bank transactions sa mga Duterte. Nipuli ang taga Davao nga si Mel Racela (2017-2022); dayon si Matthew David (2022-2026); ug si Ronel Buenaventura sugod Marso karong tuiga.

Gihasi ba silang Abad ug Buenaventura kay wala mo-amen sa mga Duterte?

Usa kini sa mga limitasyon ni VP Sara ug sa iyang mga igsuon. Maoy ilang namat-an og buot nga ilang amahan ang hawod sa Davao. Mao ray nagbuot kinsay patrabahuon sa City Hall, taktakon, latiguhon, kabiton, o patyon. Walay balaod nga nakadulot nila. Bisan dihang nangulata siya.

Maong maglisod siya og sabot nganong dili na makuha ang bisan unsay iyang gusto, apil nang dinalian nga pagbanos sa Malacañang. Maong mo-ulbo ang iyang kaspa matag higayon nga pahinumdoman nga, ubos sa mga balaod, kinahanglan siyang moatubang ug motubag sa mga pasangil batok niya.