China kasaligan ba?
Kon gusto si Presidente Ferdinand Marcos Jr. nga molampos ang iyang pakigsabutsabot sa China sa posibleng joint exploration sa abunda nga oil ug gas deposits sa West Philippine Sea (WPS), angay niyang likayan ang mga sayop nilang:
Kanhi Presidente Gloria Macapagal-Arroyo kinsa nipasiugda niadtong 2005 sa Joint Marine Seismic Undertaking (JMSU) sa Philippine National Oil Company, China National Offshore Oil Corp, and PetroVietnam; ug
Kanhi Presidente Rodrigo Duterte kinsa nipirma uban sa China niadtong 2018 og Memorandum of Understanding (MOU) sa tinabangay sa oil ug gas development.
-o0o-
Gibasura sa Korte Suprema ang JMSU ni Arroyo kay nakalapas sa 1987 Constitution. Nga nideklarar nga ang Pilipinas maoy tag-iya sa tanang katigayonan sulod sa iyang nasudnong teritoryo ug busa angay nga maoy magkontrolar sa exploration sa lana ug dili angay nga makigsawo sa ubang mga nasud sama sa China ug Vietnam.
Wala katabang sa kawsa ni Arroyo ang daghang mga eskandalo sa iyang administrasyon. Nga naglakip sa overpriced nga P16 bilyones nga transaksiyon niya uban sa ZTE (Zhongxing Telecommunication Equipment Corporation) sa China para unta sa pagladlad sa National Broadband Network (NBN).
-o0o-
Ang upat ka tuig nga sabutsabot MOU ni Duterte uban sa China gitapos ni kanhi Foreign Affairs Secretary Teodoro Locsin Jr. pila ka adlaw dayong kahuman sa termino ni Duterte sa 2022.
Ang rason? Niinsistir ang China sa ilang pagpanag-iya sa tibuok South China Sea (nga naglakip sa WPS). Samtang nabugkos ang Pilipinas sa pagpatigbabaw sa 2016 Arbitral Ruling (kadaogan sa kaso nga gipasaka ni anhing Presidente Noynoy Aquino batok sa China) ug sa 1987 Constitution.
-o0o-
Unsay paglikay ni Marcos ang mga bulilyaso nilang Arroyo ug Duterte? Mahimong magpalaban sa pribadong kompaniya ni Manny Pangilinan (PXP Energy Corporation) nga gikontrata sa Department of Energy (DOE) sa exploration sa Recto Bank sa WPS. Kay mas gawasnong makigsabot sa pribadong mga kompaniya sa China (pero kinahanglan gihapong motuman sa atong konstitusyon).
Tingali gilaoman ni Marcos nga tungod sa krisis nga namugna sa gubat sa Iran dili na sama kagahi ang baruganan sa China. Pero bisan pa kon mosaad ang China pagtuman sa mga balaod sa Pilipinas, unsay garantiya nga dili na nila ilugon ang WPS?
- Latest
