Alas batok Sara?
Kumbinsido ang mga kongresista nga duna silay alas batok ni Bise Presidente Sara Duterte. Seguro na nga ma-impeach si Duterte sa ikaduhang sunudsunod nga tuig. Human mapresentar ang mga saksi ug mga ebidensiya sa complainants sa mga husay sa House Justice Committee sa sunod buwan, walay duda nga aprobahan sa plenaryo ang rekomendasyon sa pagpasaka sa articles of impeachment ngadto sa Senado.
Para sa mga kongresista labing mapuslanon ang ilang alas sa Senate impeachment trial. Masaligon nga dili sila maglisod pagkumbinser sa labing menos 16 ka senador pagkonbikto ni Sara.
-o0o-
Unahon nato paglista unsay ilang giisip nga dili alas?
Dili si Ramil Madriaga. Kay wala silang kaseguro sa kamatinud-anon sa piniriso sa kidnapping. Mahimo ganing sinugo sa mga Duterte paglawgaw sa prosekusyon.
Dili ang bank accounts sa mga Duterte nga giwara-wara ni kanhi Senador Antonio Trillanes sukad pa sa 2016. Kay walay nahibawo tinuod bang pasangil ni Trillanes nga binilyon ka pesos sa drug money ang nisulod sa bank accounts (apil nang P50 milyones kada unom buwan sa buwag nga accounts nilang Rodrigo, Sara, Polong, Baste, Kitty ug Honeylet).
-o0o-
Alas para sa mga kongresista ang ebidensiya nga naa na nila. Dili na kinahanglan nga lalisan pa sa Korte Suprema duna ba silay katungod pag-abli: Ang statements of assets, liabilities ug net worth (SALNs) ni Sara nga gisupina na nila gikan sa Ombudsman.
Sa ilang pasiunang kuwentada, P30 milyones ngadto sa P40 milyones ang kita ni Sara sukad sa iyang unang puwesto gobyerno sa 2007. Maong lisod tuohan ang gideklarar niyang net worth nga P88 milyones sa SALN sa 2024.
-o0o-
Mapasabot ni Sara ang dakong burot sa iyang katigayonan kon makapakita og mas dakong kita sa ilang law office uban sa iyang bana ug uban nilang mga negosyo sa Davao City ug uban nilang kabtangan.
Maong supinahan sab ang mga dokumento sa Securities and Exchange Commission ug Bureau of Internal Revenue. Pila may ilang kita ug pilay gibayran nga buhis? Mas importanteng pangutana: Nganong wala man ideklarar sa SALN? Pamakak sa SALN, ug mao ni gilaoman sa mga kongresista nga sayon nilang mapamatud-an, maoy nakapa-impeach ni anhing Chief Justice Renato Corona.
- Latest
