Sapaw ra si Frasco?
Mao diay nga si Presidente Ferdinand Marcos Jr. hanap og mga detalye unsay trabaho ni kanhi Tourism secretary Christina Frasco isip presidential adviser for sustainable and resilient communities. Mao diay nga hasta si Frasco walay klarong detalye unsay kapuslanan sa iyang bag-ong puwesto.
Naglibutlibot ra ang ilang mga mensahe sa mga pulong nga sustainable (malungtaron) ug resilient communities (lig-on nga mga komunidad). Wala sila katabang sa pagpapas sa mga pagduda nga ulog-ulog ra ang appointment. Aron lang nga dili mangluod ang politikanhong partido ni Frasco sa Sugbo.
-o0o-
Laing posibilidad mao nga wala silang kabasa sa Republic Act No. 10121, ang Philippine Disaster Risk Reduction and Management Act sa 2010. Nga maoy nagtukod sa National Disaster Risk Reduction and Management Council (NDRRMC). Tanang bag-ong trabaho ni Frasco, nga giapas na lang pagpahibawo sa Malacañang, naapil sa mas komprehensibong mga probisyon sa balaod:
Section 2 nga nagsugo sa NDRRMC pagtukod og resilient communities ug pagpatuman sa sustainable development strategies; ug
Section 6 nga nitahas sa NDRRMC pagtambag sa presidente sa pangandam, paglikay, pag-iban sa kadaot ug pagtabang sa mga biktima sa katalagman.
-o0o-
Unsa may himuon ni Frasco? Sapawan niya ang mas dakong organisasyon sa NDRRMC? Wala ra bay reklamo ang presidente sa ahensiya nga tigtambag niya pagdeklarar og state of national calamity. Kay ang NDRRMC gipangulohan sa usa sa labing gidayeg niyang sakop sa Gabinete.
Si Defense Secretary Gibo Teodoro, lahi ni Frasco, wala pasanginli og mga eskandalo. Wala mo-epal sa puwesto. Iyang direksiyon maoy gisunod sa presidente pagsukol sa panghasi sa China sa West Philippine Sea.
-o0o-
Ang Independent Commission on Infrastructure (ICI) nga gipasaligan ni Marcos Jr. nga mangulo sa labing komprehensibong imbestigasyon sa ?1.7 trilyones nga flood-control scandal bungkagon na karong Marso 31. Gitukod sa Septiyembre sa niaging tuig pero Disyembre na nahatagan og budget.
Ang bag-ong opisina ni Frasco, nga klarong gidalidali lang og tukod aron pag-alam-alam niya, dili sama ka-importante ug ka-dinalian ang trabaho (kay gituman na man sa NDRRMC). Ambot mahatagan na ba og pundo sa dili pang sunod nga State of the Nation Address. Kana, kon naa pa siya sa puwesto unya sa Hulyo.
- Latest
