Pangiyugpos sa krisis

Kapin tulo ka semana nang gubat sa Iran. Abunda ang mga pasidaan sa kalibotanong krisis sa lana. Pero mas gitutokan sa administrasyon ni Presidente Ferdinand Marcos Jr. ang pagpasalig nga dili grabe ang epekto sa gubat sa Pilipinas. Kay sa aktuwal nga paghimo og mga lakang sa pagmenos sa kadaot nga mahiagoman sa mga Pilipinhon.

Maong karon pa nagkara-kara ang administrasyon pagpangita og alternatibong mga tinubdan sa lana (dihang gibisto sa oil companies nga bakak ang pasalig sa Malacañang nga molungtad og duha ka buwan ang nahibiling suplay sa lana).

***

Pagsugod pa lang sa 2026 andam nang budget para sa fuel subsidy sa mga drayber sa mga sakyanang pamasahero, mga mag-uuma ug mga mangingisda. Pero mas gipalabi sa administrasyon ang pagsaad nga tabangan ang tanang maapiki sa gubat. Kay sa aktuwal nga pag-andam sa ayuda.

Karon pa nagkara-kara ang administrasyon sa paghingpit sa mga detalye unsaon pag-apud-apod ang ayuda. Nahatagan nang tricycle drivers sa niaging semana ug isunod ang mga drayber sa ubang public utility vehicles karong semanaha. Sa Metro Manila. Maglaway ang taga Sugbo ug ubang mga probinsiya.

***

Nipasidaan ang Department of Energy nga tabangan sila sa kapolisan sa pagsusi sa gasoline stations aron pagseguro nga walay mag-una-una pagpaburot sa presyo ug walay motago sa ilang suplay sa lana.

Dihang nagbaha nang mga reklamo sa mga pasahero ug mga motorista sa hoarding ug pagpa-uminto sa presyo bisan sa mga adlaw nga wala masaboti, nikumpisal si Energy Secretary Sharon Garin nga tungod sa deregulasyon sa industriya wala diay silay ngipon batok sa mga kompaniya sa lana.

***

Angayng sundon sa katawhan ang mensahe sa administrasyon nga magpabilin tang kalma pero magsunod sa mga panghitabo. Pero nasobrahan ra sang kakalma sa Malacañang. Nga samtang nideklarar nang emerhensiya ang ubang kanasuran, istorya ray gihimo sa administrasyon, imbes aktuwal nga pangandam.

Bisan ilang sulti dili matinud-anon. Gipasalig nga abunda ug barato ang bugas humay. Pero niabot na og ?70 ang kilo sa pipila ka kamerkadohan ug pangitaon pa g’yud ang suplay. Niawhag sa katawhan nga maghinugtanay sa bakos. Pero walay timaan nga mga opisyal sa gobyerno andam nga magdaginot ug magsakripisyo. O bisan momenos na lang sa ilang pangawat.