Guwapang saging

Nakadawat ang akong asawa og tulo ka pahibawo gikan sa iyang bangko sa niaging semana: Una, nga mo-expire nang iyang debit card karong buwana; ikaduha, nga makuha na ang bag-ong card sa branch nga giablihan sa iyang account; ug ikatulo, nga magamit pa ang karaang card samtang dili pa ma-activate ang bag-ong card.

Kay nagkinahanglan man siya og cash, gisugo ko niya pagbisita sa ATM nga kinadul-an sa among balay. Pero nibalibad ang ATM nga dili na magamit ang card sa transaksiyon. Gitambagan siya sa bangko nga i-activate nang bag-ong card.

* * *

Dihang nadawat sa akong asawa ang bag-ong card, gipalihug na sab ko niya paghapit sa ATM para sa activation. Laing ATM nga akong naadtoan nipahibawo nga walay mahatag nga cash pero makahimo sa ubang mga transaksiyon.

Na-activate nako ang bag-ong card ug nisumpay sa pikas nga linya para sa laing ATM. Gipahibawo ang duha nga nagsunod nako sa notisya nga walay cash. Maong nagkuyog ming tulo sa laing linya. Nabawo hinuon mi dihang giingnan sa nag-una namo nga ang ikaduhang makina para ra sa cash deposit.

* * *

Nibiyahe ko og lima ka kilometro para sa sunod nga ATM. Mas taas ang linya nga akong naabtan. Tingali tungod kay tingsuweldo man gahapon. Sa tulo ka ATM sa cubicle duha ray maayo. Dayong abot sa akong turno nahutdan og cash ang usa ka makina.

Mas dugay kay sa naandan pero nakakuha og cash ginamit ang bag-ong card sa akong asawa. Gisuwayan ang akong card aron pagsusi sama ba kadugay. Giingnan sa ATM nga dili na magamit ang akong card.

* * *

Pagkumparar sa akong asawa, managsama og expiry date ang among debit cards: 3/26. Ni-expire na diay sa Marso 1 dili sa Marso 31. Maong nisaad sa akong asawa nga online na lay sudlan nga mga transaksiyon aron kalikayan ang kalisod pagkuha og cash.

Nakalabay mi og guwapa nga saging sa daplin sa dalan. Gisugo ko niya pagpalit og usa ka sipi. Malipayong nihabwa sa sensiyo sa akong bolsa nga niabot og kapin gatos. Pero ?240 ang sipi. Ang saging naduhig sa gubat bisan wala katultol sa Iran. Ug labawng wala kaila og GCash.