Kadudahan pero paminawon

Abunda ang mga rason sa pagduda sa kamatinud-anon sa 18 ka giingong kanhi mga sakop sa Philippine Marines nga nipasangil atol sa ilang press conference nga nakahatod og kuwarta nilang Presidente Ferdinand Marcos Jr. ug ubang mga opisyal sa gobyerno.

Pero dili kana igong rason nga dili sila paminawon sa Senate Blue Ribbon Committee ug sa buhatan sa Ombudsman ug sa ubang mga ahensiya nagsusi kinsa ang kinadak-an nga mga kawatan ug unsaon sa pagbawi ang gibanabana nga nabolsa nga ?1.7 trilyones sa pagpatuman sa flood-control projects.

-o0o-

Nganong kadudahan sila:

Upat nila napamatud-an sa Armed Forces of the Philippines (AFP) nga wala mahimong sakop sa marines ug mayoriya nataktak kay dunay mga kaso;

Ilang affidavit nga nakuha sa mga sakop sa media gawas nga walay pirma wala say notaryo; ug

Mga tigpasiugda sa presscon mga personalidad nga nasakpan na sa makadaghang higayon sa pagpamakak ug pag-imbento og mga ebidensiya ug gidudahang mga sinugo sa mga kampo sa duha ka kanhi presidente nga gipasanginlang nagkonsabo aron dili makatiwas si Presidente Ferdinand Marcos Jr. sa iyang termino sa 2028.

-o0o-

Pero nganong kinahanglan silang paminawon:

Kanhi security escorts sila ni kanhi Kongresista Zaldy Co nga gipasanginlang naka-kickback og binilyon ka pesos ug nangangkon nga nakahatod og mas dagkong kantidad ngadto sa presidente ug ni kanhi House speaker Martin Romualdez;

Tinuod ang pipila sa ilang mga pangangkon, apil nang pakigtagbo nilang Ombudsman Boying Remulla ug kanhi Senador Antonio Trillanes uban sa mga imbestigador sa International Criminal Court (ICC); ug

Aron masusi kinsay nagkumbinser nila ug unsay rason sa pagbisto sa ilang nahibaw-an.

-o0o-

Dunay sukaranan ang mga pasangil nga gigamit ang kanhi marines aron paglawgaw sa kaso ni kanhi presidente Rodrigo Duterte sa ICC ug sa impeachment proceedings batok ni Bise Presidente Sara Duterte. Sama nga katuohan ang sumbalik nga gibanhaw ang impeachment aron pagtabon sa mas dagkong isda.

Pero kadudahan gihapon ang kamatinud-anon sa imbestigasyon sa flood scam sa Senado ug ombudsman. Kon interesado lang sa mga ebidensiya batok sa mga kaatbang sa administrasyon. Ug kalit lang nga nawad-an og interes sa mga ebidensiya nga maglambigit sa presidente ug sa iyang sa mga paryente ug sinaligan.