Bagis ug kolo

Makatabang ang proyekto sa Kapitolyo sa Sugbo nga online platform nga direktang mosumpay sa mga mag-uuma ug mga mangingisda ug mga konsumidor. Kon molampos ang plano sa paglaktaw sa mga komprador nga kasagaran magpahimulos sa pagpatong og mas dakong ginansiya kay sa ilang puhonan, makab-ot ang duha ka kadaogan:

•             Modako ang kita sa mga mag-uuma ug mga mangingisda (dili na mahudlat nga malata o madubok ang ilang abot kon mobalibad sa hangyo-lubo); ug

•             Mogamay ang mabayad sa mga konsumidor (dili na mabunalan sa gipaburot nga presyo sa badlungong mga negosyante).

***

Pero naleksiyon na ko nga ang press release sa mga ahensiya sa gobyerno dako og kalainan sa aktuwal nga programa. Lahi sa mga pasalig sa mga tigpasiugda ang akong naabtan sa agrilink.cebu.gov.ph.

Nangangkon sila nga mao pa gani paglusad sa website nahalinan nang mga mag-uuma sa San Remigio og usa ka tonelada nga kalbasa. Pero labihang mingawa sa pagsusi nako dayong suwat niini (tingali namahuway lang ang mga mag-uuma, mga mangingisda ug mga konsumidor sa adlawng Domingo). Hinaot nga mas sadya kon makabuylo na.

***

Sayon ra ang pagpa-rehistro isip konsumidor Hinaot dili sayon kaayo nga masudlan og mangingilad. Nipasalig ang Kapitolyo nga duna silay paagi pagsusi sa katinuod sa mga tanyag pagbaligya ug pagpalit.

Usa ra ka produkto (lettuce) ang mahimong mapalit. Dunay laing pito nga gilista pero “expired” na. Gilista nakong mga produkto nga ganahang paliton (buwad nga bagis ug kolo) uban ang gidaghanon nga gikinahanglan ug presyo nga andam bayran. Nagpaabot pa ko og tubag.

***

Molampos lang ang plataporma kon makakuha sa pagsalig sa mas daghang mga mag-uuma, mga mangingisda ug mga konsumidor. Makadani ang saad sa Kapitolyo paghatag og libreng transportasyon sa dagkong orders. Pero kasagaran mamalit lang og tagsa o pila ka kilo.

Mas daghan nang nakatultol sa Facebook marketplace ug groups. Daghan na hinuong nailad nga nakabayad nang daan pero sayop ang gihatod o wala g’yuy niabot nga produkto. Samtang mga tigbaligya nga nisugot og cash on delivery nabawo sab pagkahibawo nga ang ni-order nihatag og pekeng address ug walay hunahuna sa pagpalit. Hinaot nga ang agrilink.cebu.gov.ph mahimong mas luwas ug makiangayon nga alternatibo.