Duterte ug Marcos Sr.

Ambot tsamba ba lang, o gituyo sa puwersa nga dili masabtan sa tawhanong kinaadman, nagkadungan karong semanaha ang duha ka kalihokan nga nagtimaan sa pagkahagsa sa duha sa labing kontrobersiyal nga lider sa Pilipinas:

Magsunod sa International Criminal Court (ICC) nga confirmation of charges hearing (Pebrero 23-27) ug tinuig nga pagsusi (Pebrero 27) sa pagkapriso sa The Hague ni kanhi presidente Rodrigo Duterte; ug

Ika-40 nga anibersaryo sa EDSA People Power Revolution (Pebrero 25) nga nipalayas sa diktadura ni anhing presidente Ferdinand Marcos Sr. gikan sa Malacañang niadtong 1986.

-o0o-

Napalagpot si Marcos Sr. human sa 21 ka tuig nga pagtungkawo sa puwesto (1965-1986), apil nang iyang pagdeklarar sa martial law, pagkandado sa Senado ug House of Representatives, ug pagpriso sa iyang politikanhong mga karibal ug pagkontrolar sa nasud isip diktador sa kataposang 14 ka tuig sugod sa 1972.

Si Duterte boluntaryong nibiya sa palasyo pagkapupos sa iyang termino. Pero nisuway pagmaniobra aron nga iyang anak nga si Sara Duterte o  si Bong Go ang mopuli niya. Ug nasobrahan rang pagsalig nga iya gihapong madiktahan ang nipuli niya nga si Ferdinand Marcos Jr.

-o0o-

Usa sa mga rason nganong gi-idolo ni Duterte si Marcos Sr. mao ang katakos sa pag-una kanunay sa paghunahuna og hangtod lima ka lakang maong walay dag-anan ang bantogan niyang mga kaatbang nga gipangulohan nilang Ninoy Aquino Jr. ug Serging Osmeña Jr.

Nga mao say gipanghambog nga abilidad ni Duterte. Napangandaman nang daan ang umaabot nga mga panghitabo maong wala kabaraw niya silang Antonio Trillanes, Leila de Lima, Leni Robredo, Risa Hontiveros, ug kaubanan.

-o0o-

Wala kapangandami ni Marcos Sr. ang iyang pagkasakit. Ang haw-ang nga namugna sa iyang kaluya gipahimuslan dayon sa grupo nilang Imelda Marcos ug Fabian Ver. Maong nangluod silang Juan Ponce Enrile ug Fidel Ramos ug nisugod sa rebolusyon.

Labihan kakumbinsido si Duterte nga wala moliwat sa amahan si Marcos Jr. nga gipasanginlan niyang bangag ug gituohang palagputon sa militar ug kapolisan. Gawas nga walay polis ug sundawo nga nisuporta ni Duterte, gitugotan ni Marcos Jr. ang ICC pagdakop niya. Maong human nihulga nga pamusilon ang mga imbestigador sa ICC, nikakak sa iyang selda dihang gihatagan na og higayon pag-atubang sa mga huwes.