Libre ang gradwasyon
Para sa mga magtutudlo ug mga opisyal sa Parent-Teacher Assocation (PTA) nga nangolekta og bayranan para sa gradwasyon sa mga estudyante sunod buwan, palihug undanga ang inyong binuang. Gidid-an mo sa balaod sa pagpaningil og amot apil nang gastohan sa gradwasyon.
Ang Republic Act 5546 nipatigbabaw sa sugo sa 1987 Constitution sa libreng edukasyon. Ang titulo nilista sa mga pagdili: “An Act Prohibiting the Sale of Tickets and/or the Collection of Contributions for Whatever Project or Purpose from Students and Teachers of Public and Private Schools, Colleges and Universities.”
-o0o-
Ang balaod wala lang nideklarar nga boluntaryo ang tanang bayranan. Kon dili nibadlong g’yud sa pagpangolekta. Bug-at ang silot nga gitakda para sa mga makalapas: Multa hangtod sa ?5,000 ug priso hangtod sa usa ka buwan.
Upat ka bayranan ang gitugotan sa balaod nga makolekta (pero boluntaryo gihapon, dili mapugos ang mga bata ug mga ginikanan pagbayad): Philippine Red Cross (PRC), Boys Scouts of the Philippines (BSP), Girl Scouts of the Philippines (GSP) ug pagtabang sa barangay high schools (kay walay igong pundo ang gobyerno niadtong dekada 60).
-o0o-
Walay apil sa pagdili ang PTA. Pero gihigpitan sa Omnibus PTA Guidelines, o DepEd Order No. 13, s. 2022:
Dili makapangolekta og bisan unsang bayranan (apil ang PTA fees) atol sa enrollment hangtod sa unang buwan sa klase;
Boluntaryo ang tanang bayranan sa PTA. Dili mapugos ang mga tinun-an sa pagbayad aron lang makatambong sa ilang klase; ug
Tanang pundo sa PTA isipon nga "trust funds" ug dili mahimong isagol sa general budget sa eskuylahan.
-o0o-
Gidid-an sab ang kadagkoan sa PTA (bahala na unsa kamaayo ang ilang katuyoan) sa pagpaka-uwaw sa mga tinun-an ug mga ginikanan nga dili makabayad:
Dili mahimong pugngan ang report card, clearance, o diploma sa mga bata bisan unsa pa kadako ang wala mabayri nga PTA contributions;
Kapakyas pagbayad sa PTA dili mahimong sukaranan sa pagdili sa mga bata sa pag-apil sa bisan unsang kalihokan sa eskuylahan; ug
Dili mahimong ilista sa publiko ang mga wala makabayad (pinaagi sa roll call, o group chat, o paghatag og dugang points sa mga makabayad) kay maisip nga pakauwaw, pamugos, ug panghasi.
- Latest
