Dili uwan ra

Mangahas ko og tubag sa mga nanaway sa mga estudyante nga nihangyo sa pagsuspenso sa klase tungod sa tibuok adlaw nga uwan niadtong Martes:

Niadtong kita pay mga batan-on ang uwan, uwan ra gyod. Pero karon ang uwan, bisan dili makalilisang kakusog, moresulta sa pagbaha ug pagdahili sa yuta. Nga mahimong mobanlas o molubong sa kabalayan. Mahimo ganing moanod, moangol ug molumos sa mga biktima. Maong ang uwan, dili uwan ra. Mahimo sang magkahulogan og kinabuhi o kamatayon dili lang sa mga bata kon dili apil na sa mga dagko.

-o0o-

Mahimong may sukaranan ang tambag nga ang mga bata angayng anaron sa uwan aron pag-andam nila sa mas grabe pang kakulian sa tinuod nga kinabuhi sa umaabot.

Pero dili tiaw-tiaw ang kinabuhi nga ilang gipuy-an karon. Uban sa kinabag-an sa katawhan, ang kabataan nabiktima na sab sa pataka nga mga lagda ug lapad nga pangurakot. Gikawat ang pundo sa pagtukod og classrooms ug pag-hire og mga magtutudlo ug pagpatik sa mga libro. Kay gipalabi ang pamolitika ug mga paukyab. Sama sa, nakatag-an ka, walay kapuslanan nga flood control projects.

-o0o-

Dili uwan ray problema sa mga estudyante sa Campo 4 sa Talisay City. Naguba ang ilang hanging bridge sa bagyong Tino ug wala mag-apura ang munisipyo pag-ilis sa taytayan. Dili silang kaubog sa sapa tungod sa kalawom ug kakusog sa bul-og. Maong namidpid sa kilid sa bukid aron lang makapauli.

Solusyon sa gobyerno? Gitak-opan ang peligro nilang ruta ug gisugo ang eskuylahan pagsuspenso sa klase. Imbes pangitaan og luwas nga agianan aron dili masakripisyo ang pag-eskuyla.

-o0o-

Tinuod nga uwan rang uwan sa nangaging katuigan. Pero salamat sa pangabuso sa mga politiko ug sa mga botante nga nipabilin nila sa gahom, ang yanong uwan nahimo nang bangis nga katalagman.

Maong ang pagsuspenso sa klase mao ray dag-anan sa mga bata ug mga magtutudlo gikan sa kaalaotan. Hangtod nga mapalig-on nang mga eskuylahan ug luwas nang kadalanan ug mga taytayan ug kasapaan. Nga mahitabo lang kon mabadlong nang grabeng kinawatay. Nga mahimo lang kon mapalagpot nang mga kukhan gikan sa gahom. Nga matuman lang kon mahaw-as ang kinabag-an gikan sa kakabos. Nga makab-ot lang kon matarung nang edukasyon.

[email protected]