Padayon ang abuso
Kapin sa duha ka buwan na human sa bagyong Tino, nga nikalas og 150 ka kinabuhi ug nibanlas og minilyon ka pesos nga balor sa kabalayan ug kabtangan, wala pay bisan usa nga napasakaan og kaso sa mga responsable sa trahedya.
Walay nangahas pagkiha sa kurakot nga mga politiko, mga opisyal sa Department of Public Works and Highways (DPWH) ug mga kontraktor sa substandard nga flood control projects. Ug walay nagtagad pagpaningil sa iresponsableng developers ug quarry operators ug sa gi-suburnohan nila nga local government units ug nasudnong mga ahensiya.
-o0o-
Wala ayuha ang gibanlas nga flood control projects. Ambot duna bay budget. Walay kuwarta sa bag-ong flood control projects karong tuiga. Walay plano ug pundo pagpatuman sa master plan sa Japan International Cooperation Agency (JICA) pagtukod og dams sa ibabaw sa mga suba. Nagpadayon ang pag-upaw sa kabukiran.
Sa ato pa, kon simbako, layo ra to, tabukon og pito ka dagat, dunay laing bagyo nga susama kadaghan ang ibundak nga uwan ni Tino, wala gihapoy panagang ang mga Sugbuanon. Posibleng mas daghan ang mangamatay ug mas lapad ang kadaot.
-o0o-
Gawas sa Monterrazas de Cebu, walay laing developer sa kabukiran sa Sugbo nga gibadlong ang Department of Environment and Natural Resources (DENR). Wala sab silay gipahunong nga quarry operators nga nipahak sa mga bukid ug niguba sa mga suba.
Gisuspenso tuod ni Cebu Governor Pam Baricuatro ang gagmay nga quarry operations. Pero makabungog nang iyang kahilom kon gikiha ba ang mga nangabuso sa kinaiyahan ug nakalapas sa ilang permiso sa Kapitolyo.
-o0o-
Gipasanginlan ang administrasyon ni kanhi Gobernador Gwen Garcia nga napakyas pagbadlong sa sindikatong nipaburot sa presyo sa bas ug graba. Maong mas mahal sa Sugbo kay sa mas maayong klase sa Metro Manila. Dihang gilubong ni Baricuatro og taga liog si Garcia sa niaging eleksiyon, gilaoman nga mabungkag ang sindikato ug mobaratong presyo.
Ikapito na karong buwan sa bag-ong liderato, walay motarung pagtubag sa among pangutana napapas na bang sindikato. Pero ang pait nga kamatuoran mao nga imbes mo-barato ni-mahal ang bas ug graba. Peligro nga kon ang sindikato dunay konsabo sa karaang liderato, gipulihan lang sa bag-ong mga hawod sa Kapitolyo.
- Latest
