Dugo sa ilang kamot

Gipatawag sa Cebu City Council sa ilang tigom karong Enero 28 ang gipasanginlan nga mga responsable sa trahedya sa Binaliw landfill nga nipatay sa 36 ka trabahante:

Mga sinaligan sa bilyonaryong si Enrique Razon nga angayng mopasabot nganong nagtumpi sila og mga basura (ang bukid nga natumpag niadtong Enero 8 gihulagway nga sama na kataas sa 20 ka andana nga building); ug

Kadagkoan sa Department of Environment and Natural Resources (DENR) nga angayng tulisukon sa ilang pag-isnab sa sibawng reklamo sa mga molupyo sa grabeng kahugaw ug kabaho sa landfill.

-o0o-

Mangahas ko og sugyot nga imbestigahon sab sa mga konsehal ang ilang kaugalingon. Abunda sila og pagarpar pero walay nahimo sa pagbaraw sa klarong binuang nga operasyon sa kompaniya ni Razon.

Kutob ra sila sa pagpaminaw sa mga nagpalaban nga taga Binaliw ug Panoypoy (silingang barangay nga sakop sa Consolacion) ug pagpasalig nga aksiyonan ang pait nga kahimtang. Pero dihang wala paminawa sa mga pangulo sa DENR ug sa mga mayor ang ilang mga rekomendasyon pagtarung sa operasyon, ang mayoriya sa mga konsehal igo rang nangiyugpos ug nagpakahilom pagbalik.

-o0o-

Makapanghunaw ang mga konsehal nga wala silay gahom pagpatuman sa ilang gisugyot nga mga sulbad. Makapangangkon nga wala magkuwang paglaban sa mga molupyo, sama sa ilang pagpasar og resolusyon pagpasira sa landfill niadtong Septiyembre 2020 human sa privilege speech sa ilang presiding officer, si kanhi bise mayor Mike Rama. Pero gisukwahi sila ni anhing mayor Edgar Labella.

Dihang na-mayor sa pagkamatay ni Labella si Rama nakalimot sa iyang baruganan. Niapil hinuon pagdupa sa negosyo ni Razon.

-o0o-

Mga alyado sa politika ang mayoriya sa City Council nilang Labella, Rama, ug kanhi mayor Raymond Garcia. Wala g’yuy rason nganong nisugot lang nga ma-inutil batok sa mga sakop ni Razon sa Binaliw. Mao’ng makuwestiyon ang kamatinud-anon sa ilang trabaho. Kapasanginlan pa gani nga igo ra’ng ni-ulog-ulog sa mga naapiki sa landfill.

Hinaot nga makabawi sa higante nilang atraso (apil sa mga responsable sa trahedya, pagkahugaw sa mga tinubdan sa tubig sa Binaliw ug Panoypoy ug pagsulbong sa mga sakit sa mga molupyo). Kay mayoriya sa mga konsehal dili na under-the-bunal nilang Mayor Archival ug Bise Mayor Tommy Osmeña.