Eskandalo sa Binaliw
Kon subayon ang kasaysayan sa basurahan sa Binaliw, sukad sa pagsugod niadtong 2017 hangtod nahagsa ang 20 ka andana nga bukid sa basura sa niaging semana nga gikahadlokang nakapatay og kapin 30 ka trabahante, mabantang ang lang-og nga kamatuoran:
Mga tagdumala (ARN ug Enrique Razon) ug mga politiko (gipangulohan sa lima ka nagsunod nga Cebu City mayors) nipalabi sa negosyo ug politika;
Regulators (Department of Environment and Natural Resources ug Environment Management Bureau) nipabor sa mga negosyante ug mga politiko; ug
Gipasagdan ang mga molupyo nga nag-antos sa kabaho ug kahugaw.
-o0o-
Tungod sa ilang pagtulisok ni kanhi Mayor (karon Bise Mayor) Tommy Osmeña nga maoy tag-iya sa basurahan (wala silay napakitang ebidensiya), gikanselar ni anhing Mayor Edgar Labella ang kontrata sa City Hall ug ARN Central Waste Management ug gi-privatize ang koleksiyon sa basura.
Resulta? Plunder. Nipasangil ang National Bureau of Investigation nga gipasobrahan og ?239 milyones ang ilang bayad sa duha ka kontraktor. Nasakpan nga giapil pag-ihap ang gipanghatod sa barangay garbage trucks ug ghost deliveries sa mga buwan nga wala na sila kabayad sa ARN sa Binaliw.
-o0o-
Sukad nilang Osmeña ug Labella hangtod nilang Mike Rama Raymond Garcia ug Nestor Archival, ug sa nag-ilis-ilis nga mga liderato sa EMB ug DENR, gi-isnab ang tiyabaw sa mga molupyo sa pag-abuso sa kinaiyahan ug paglapas sa mga lagda sa tarung nga paghipos sa basura sa ARN ug ni Razon.
Gipasa-pasa rang ilang mga petisyon sa nahiagomang grabeng kahasol, pagkasakit sa pagsulbong sa mga kagaw sa palibot ug pagkahugaw sa ilang mga tinubdan sa tubig.
-o0o-
Paspas nga nilista ang DENR og mga sulbad sa Binaliw. Mas paspas ang mga politiko nga nakahingalan og alternatibong mga basurahan. Sama sa ilang gihimo sa nangaging katuigan. Kuyawan ta sa pamilyar nang resulta ning lab-as nilang mga pagarpar.
Hilom ang mga kongresista. Nga dunay binilyon ka pesos nga allocables ug non-allocables kada tuig hangtod karong tuiga. Nakahimo na tingali og kuwentada sukad pa sa una: Nga mas daghan ang ilang ma-bolsa gikan sa flood control projects ug farm to market roads kay sa tarung nga sanitary landfills ug mga planta nga mohimong kuryente sa mga basura.
- Latest
