PhilHealth ug MAIFIP
Nia na say laing palusot si Health Secretary Ted Herbosa: Dili kuno angay nga ipuno sa Philippine Health Insurance Corp. (PhilHealth) ang pundo sa Medical Assistance to Indigents and Financially Incapacitated Patients (MAIFIP) kay wala kabayad ang PhilHealth sa iyang utang sa mga ospital.
Sakto nga utangan ang PhilHealth (?1 bilyon sa uwahing subay sa Commission on Audit). Pero kahibawo si Herbosa nga ang pagpamugos sa MAIFIP maoy usa sa mga rason nganong wala katuman ang PhilHealth sa mga obligasyon, labi nang pagbayad sa mga benepisyo sa iyang mga sakop.
***
Dili ?60 bilyones ray gikawat gikan sa mga sakop sa PhilHealth. Isip pangulo sa PhilHealth Board, nasuhito si Herbosa giunsa pagtulis sa Malacañang sukad pa sa administrasyon ni kanhi presidente Rodrigo Duterte ang pundo nga para unta sa labing kabos ug labing masakiton nga mga Pilipinhon:
• ?130 bilyones sa koleksiyon sa buhis sa soft drinks, bino, ug sigarilyo ang gihikaw gikan sa PhilHealth sukad sa 2023; ug
• ?107 bilyones nga bahin sa kita sa Philippine Charity Sweepstakes Office (PCSO) ug Philippine Amusement and Gaming Corp. (PAGCOR) sukad sa 2019.
***
Puno sa mga kawat nga nalista sa ibabaw, ang pagpaburot sa MAIFIP ngadto sa ?51.6 bilyones sunod tuig makapadayon sa pag-apiki sa PhilHealth. Kon gipuno pa sa PhilHealth mas daghan untang mga pasyente ang maluwas sa sakit ug kamatayon.
Pero si Herbosa itoy sa mga politiko. Nga maoy nagpahimutang niya sa puwesto ug dili ganahan nga saktuhon ang pundo sa PhilHealth. Kay makadiretso ang mga pasyente sa mga ospital. Nga dili kinahanglang magpakilimos sa mga politiko.
***
Gawas sa tinuyo nga kakuwang sa pundo, ang laing buslot sa PhilHealth mao ang grabeng pangurakot. Nga hagbay ra untang nahunong kon gitinuod pa lang sa pagbaraw nilang Herbosa ug kaubanan sa PhilHealth Board.
Nagpadayon ang sindikato sa PhilHealth sa pagpasiuga sa anomalusong mga transaksiyon. Inutil silang Herbosa kay, sama sa lapad nga kinawatay sa flood-control projects sa Department of Public Works and Highways (DPWH), ug sa binuang nga koleksiyon sa buhis sa Bureau of Customs (BOC) ug sa Bureau of Internal Revenue (BIR), abunda ang bahin sa mas dagko nila og ranggo sa palasyo.
- Latest
