Mapriso nang taga Sugbo?
Kon matinuod ang sulti ni Ombudsman Boying Remulla, duna nay Sugbuanon nga mapriso karong semanaha tungod sa ?1.2-trillion flood-control scandal. Kon mahinayon ang pagpasaka og mga kasong kriminal batok niya, luwatan dayon og arrest warrant ug dili maka-piyansa para sa temporaryong kagawasan.
Mag-una siya sa mga kongresista sa Sugbo nga hangtod karon nagpabiling tak-om sa grabeng kinawatay. Mag-una pa g’yud sa kontraktor sa Sugbo nga ginganlan sa State of the Nation Address (SONA) ni Presidente Ferdinand Marcos Jr. kay apil sa nakasipong sa kinadaghanang flood-control projects.
***
Siya si kanhi presidential assistant for the Visayas nga si Terence Calatrava. Kansang courtesy resignation gidawat sa Malacañang niadtong Hunyo. Usa ka buwan sa wala pa ang “Mahiya naman kayo” nga SONA sa presidente niadtong Hulyo 28.
Si Calatrava gipasanginlan sa magtiayong Sarah ug Curlee Discaya sa ilang pag-atubang sa Senate Blue Ribbon Committee niadtong Septiyembre nga nangayo og kickback bugti sa ilang pagdaog og mga kontrata sa Department of Public Works and Highways (DPWH). Wala maghisgot ang mga Discaya unsay mga proyekto ug pilay ilang nahatag ni Calatrava.
***
Labaw ni kanhi kongresista Zaldy Co, mas suod si Calatrava ni kanhi House speaker Martin Romualdez. Iyang asawa nga si Happy igsuon sa asawa ni Martin nga si Kongresista Yedda Romualdez. Si Martin maoy responsable sa pagkatudlo ni Clarence nga presidential assistant. Si Martin sab ang nipadagan ni Happy pagka kongresista ubos sa Tingog Patylist sa eleksiyon niadtong Mayo.
Kon determinado si Remulla sa pagsusi unsay papel ni Martin sa kinawatay dakong bentaha kon makumbinser si Calatrava sa pagtabang sa prosekusyon.
***
Kon makiha ug mapriso na si Calatrava karong semanaha, nga momatuod sab nga laos na si Martin, mosamot nga wala nay tarung nga kinatulgan ang ubang mga Sugbuanon nga gilambigit sa eskandalo.
Dunay sukaranan ang ilang kahadlok nga apurahon nang Remulla ang graft investigators sa Ombudsman Visayas. Aron palig-unon ang mga kaso batok sa mga kongresista, mga kontraktor ug mga opisyal sa DPWH. Nga gipasanginlang nagkonsabo sa pagsurikbot sa niaging 10 ka tuig sa ?50 bilyones nga flood control projects sa Sugbo, nga imbes makasulbad nipasamot na man hinuon sa mga baha.
- Latest
