Balitok ni BBM

Unsa man ang nahitabo ni Presidente Ferdinand Marcos Jr. sa niaging pito ka adlaw:

Sa iyang press conference sa niaging semana, Nobyembre 14, niingon siya nga wala pay ebidensiya nga molambigit ni kanhi House speaker Martin Romualdez sa grabeng kinawatay sa flood control projects; pero

Sa iyang video message sa sayong buntag gahapon, Nobyembre 21, gisugo niya ang Independent Commission for Infrastructure (ICI) ug ang Department of Public Works and Highways (DPWH) sa pagsumiter ngadto sa Ombudsman sa tanang ebidensiya sa kasong plunder batok ni Romualdez.

-o0o-

Unsay bag-ong ebidensiya nga nakapa-usab sa hunahuna sa presidente? Bugtong dokumento nga nihingalan ni Romualdez sa mga gisumiter sa ICI ug DPWH sa Ombudsman gahapon mao ang affidavit ni Sgt. Orly Goteza nga ni-detalye sa tulo ka hugna nga paghatod og kuwarta sa mga balay ni Romualdez.

Pero gibasa ni Goteza ang affidavit (kansang pirma sa abogada nag nag-notaryo gi-peke) atubangan sa Senate Blue Ribbon Committee niadto pang Septiyembre 25, dul-an duha ka buwan ang nilabay. Ug wala na siya pakita sa Senado, ICI, ug Department of Justice.

-o0o-

Maong gidudahan nga ang rally sa Iglesia ni Cristo (INC) niadtong Domingo ug Lunes (Nobyembre 16 ug 17) maoy nakapugos sa presidente sa pagsakripisyo sa iyang ig-agaw. Mahimong ang pagkiha ni Romualdez maoy usa sa kundisyon sa INC sa wala nila pag-awhag sa resignasyon ni Marcos.

Laing pangagpas: Dili mahimong angkunon nga nasayop sila sa pagsuporta sa UniTeam pinaagi sa pagbasol nilang Marcos ug Bise Presidente Sara Duterte. Ug si Romualdez ang kinatas-ang opisyal sa administrasyon nga kapahimungtan.

-o0o-

Wala hinuoy motuo nga walay labot si Romualdez sa ?1.2 trillion flood control scandal. Nga nag-novena siyang nagpiyong samtang nag-iyahay og pangawat ang iyang sinaligang mga kongresista. O mahimong nakumbinser na si Marcos nga si Romualdez makadaot, dili makatabang, sa paglugway sa iyang impluwensiya lapas sa 2028.

O mahimong nituo na sa mga pasidaan nga kon dili mapriso (bahala na kon dili masilotan) si Romualdez siya ug iyang pamilya na ang sunod nga puntiryahon. Sa mas lapad nga mga protesta ug mas makalilisang nga kasuko sa katawhan. Nga lahi sa kadagkoan sa INC dili niya mahimo nga hapuhapon ug ulug-ulogan.