Price freeze

Tungod sa deklarasyon ni Presidente Ferdinand Marcos Jr. sa usa ka tuig nga state of national calamity tungod sa bagyong Tino, walay tugotan nga uminto sa presyo sa inadlawng palaliton sa Sugbo ug ubang mga probinsiya nga grabeng naigo sa katalagman.

Ang price freeze (sa canned goods, instant noodles, powdered milk, pan, asin, detergent soap, bottled water ug uban pa), nga hinaot mapatuman sa Department of Trade and Industry (DTI) ug local government units (LGUs) molungtad og 60 ka adlaw (sugod sa Nobyembre 5, 2025 hangtod sa Enero 4, 2026).

Ang price freeze sa mga produkto sa lana mapatuman lang sa kerosene ug LPG (liquefied petroleum gas), kay maoy gikinahanglan sa mga panimalay (apil nang labing kabos nga mga pamilya).

Walay uminto sa kerosene karong semanaha (bisan nisaka og ?1.20 kada litro ang gasolina ug ?1.20 kada litro ang diesel sugod alas-6 karong buntag). Dili ipatuman sa oil companies kon dunay uminto sa LPG sunod buwan (kay kada sugod sa buwan man ang kausaban sa presyo). Molungtad ang price feeze hangtod sa ikatulong semana sa bag-ong tuig.

Walay apil sa price freeze ang gasolina ug diesel. Tungod sa kalapad sa kadaot sa duha ka sunudsunod nga bagyo (Tino ug Uwan), nihangyo ang Department of Energy (DOE) nga pasayluon sa uminto ang mga motorista sa apektadong mga lugar.

Nisugo sa pito ka kompaniya sa lana: Petron, Shell, Caltex, Phoenix, Seaoil, Jetti, ug Petro Gazz. Pero silay nagbuot unsang mga lugara ang walay uminto. Nilang pito, ang Jetti ray nilista sa Sugbo nga walay uminto sugod karong semanaha.

Ang price freeze sa gasolina ug diesel sa piniling mga lugar kutob ra sunod semana. Mapahimuslan lang sa mga Sugbuanon ang price freeze sa gasolina ug diesel kon magpatubil sa Jetti.

Nganong ang DOE dili man sama kaisog sa DTI pagpatuman sa price freeze sa oil products? Tubag: Oil deregulation law (Republic Act No. 8479) sa 1998. Nga nitugot sa oil companies pag-usab sa ilang presyo sa walay pananghid sa gobyerno. Gitumong untang balaod pagdasig sa gawasnong kumpetinsiya. Pero nagkinopyahanay na hinuon ang oil companies sa ilang uminto ug us-os hangtod sa kataposang sentabo.