Dukdok ni Duke
Salamat sa mga kasong kriminal ug administratiba nga gipasaka ni Atty. Julito Añora Jr. batok niya sa Ombudsman, si Kongresista Duke Frasco niangkon sa sekretong gilumloman sulod na sa usa ka semana:
Didto gyod diay sa London dihang nangalumos ang mga biktima sa bagyong Tino sa iyang distrito. Niang mga buslot sa iyang mga palusot:
-o0o-
Opisyal ang biyahe kay sakop siya sa Philippine delegation sa World Travel Market. Giabaga sa Department of Tourism (DOT) ang mga panginahanglan sa delegasyon. Nganong niinsistir man si Frasco nga nigasto sa iyang personal nga kuwarta? Apil ba sab sa delegasyon ang mga mayor ug nigamit ba sab sa personal nilang pundo?
Niabot sila sa London sa Nobyembre 4 ug pagkahibawo sa dakong kadaot sa bagyo nisakay dayon sa unang flight balik sa Sugbo. Lahi ang sulti ni Compostela Mayor Jury Quiño: Sa Dubai layover nahibawo na sila sa kadaghan sa nangamatay, maong nibalik si Quiño sa Sugbo samtang ang iyang kaubanan nidayon sa London. Kon nagdali og balik gikan sa London, magkadungan unta silang Liloan Mayor Aljew Frasco nga nitugpa sa Mactan sa gabii sa Nobyembre 5. Niabot di Duke sa gabii sa Nobiyembre 6. Pila na lang ka oras sa wala pang pagduaw ni Presidente Ferdinand Marcos Jr. sa Liloan sa Nobyembre 7.
-o0o-
Si Gobernador Pam Baricuatro ang niaprobar sa travel authority sa mga mayor ug maoy dunay gahom pagkanselar sa ilang biyahe. Si Pam na say sad-an? Gilayasan diay silang Frasco ug kaubanan sa kabuot nga nigiya ni Borbon Mayor Nico Dotillos pagkanselar sa iyang biyahe sa Oktubre 27 tungod sa bagyo?
Wala siyay labot sa pagdumala sa mga lugar nga maigo sa katalagman kay isip kongresista tulo ray iyang trabaho nga gitakda sa 1987 Constitution: representation, legislation ug oversight. Kon mao, nganong giangkon mang tanang kredito pinaagi sa tarpaulins nga nihuot ang iyang dagway sa gitukod nga flood control (apil nang nabulilyasong riprap sa Cotcot River) ug ubang mga proyekto sa tibuok distrito? Ug nganong nilaag man sa London nga wala man diay apil sa iyang trabaho ang pagtangkil sa iyang batabata nga mga mayor sa pagsunudsunod sa iyang asawa nga si Tourism Secretary Christina Garcia Codilla Frasco?
- Latest
